ҚЫРҒЫЗСТАН ЭКС-ПРЕЗИДЕНТІ ҮЙСІЗ ҚАЛДЫ

Полиция арнайы құралдар қолданып, үйдің есігін қайрақпен кесіп ашқан. Кейін үйдің ішіндегі барлық заттар сыртқа шығарылып, ғимаратқа күзет қойылды.

Экс-президенттің ұлы мен қызының айтуынша, ата-анасы қазір туыстарының үйінде тұруға мәжбүр. Олар бұл жағдайды ауыр қабылдағанымен, қолдау білдірген барша азаматтарға алғыс айтты. «Біз үшін ең бастысы – халқымызбен бірге болу», – деді отбасы мүшелері.

Ресми мәліметке сәйкес, билік Атамбаев резиденциясының орнына әлеуметтік нысандар салуды жоспарлап отыр. Атап айтқанда, ол жерде қарттар үйі мен балабақша ашу көзделген. Ал Атамбаевтар отбасы болса, Қой-Таштағы резиденция олардың жалғыз баспанасы екенін айтып отыр.

Бұл оқиғаға негіз болған сот шешімі 2020 жылы қабылданған. Сот орындаушылары Бішкектің Первомай аудандық сотының шешімін жүзеге асырып отыр. Алайда отбасы аталған шешімді заңсыз деп санап, Жоғарғы сотқа шағым түсірген.

Еске сала кетейік Алмазбек Атамбаев 2011–2017 жылдары Қырғызстан президенті қызметін атқарған. Кейін ол жемқорлық пен жаппай тәртіпсіздіктерге қатысы бар деген айыппен сотталды. 2019 жылы дәл осы Қой-Ташта оны ұстау операциясы кезінде арнайы жасақпен қақтығыс болып, бір офицер қаза тапқан еді. Сол оқиғадан бері резиденция төңірегінде дау тоқтаған жоқ.

Қоғамда бұл іске қатысты пікір екіге бөлінді: бір бөлігі биліктің резиденцияны әлеуметтік нысандарға беруін қолдаса, енді бір бөлігі мұны саяси қысым ретінде бағалап отыр. Құқық қорғаушылар да бұл процесті жіті бақылауда ұстап, заң аясында әділ шешім қабылдануы қажет екенін айтуда.

Қазіргі таңда Атамбаевтар отбасы уақытша туыстарының үйінде тұрып жатыр, ал резиденциядағы мүліктер түгелдей сыртқа шығарылған. Сот процестері жалғасуда, түпкілікті шешім Жоғарғы сот құзырында.