ҚАСЫМ-ЖОМАРТ ТОҚАЕВ ҚЫТАЙДЫҢ ЖЕТЕКШІ КОМПАНИЯЛАРЫНЫҢ БАСШЫЛАРЫМЕН КЕЗДЕСТІ
Қазақстан Президенті Қасым-Жомарт Тоқаев Қытай Халық Республикасының жетекші компаниялары мен ірі бизнес өкілдерімен кездесті.
Кездесу «дөңгелек үстел» форматында өтіп, онда екі ел арасындағы экономикалық ынтымақтастықты одан әрі дамыту, инвестициялық байланыстарды нығайту және бірлескен жобаларды жүзеге асыру мәселелері талқыланды.
Мемлекет басшысы қытайлық серіктестерге Қазақстанмен өзара тиімді әріптестік орнатуға қосқан үлесі үшін ризашылығын білдірді. Президент Қазақстан мен Қытай арасындағы қарым-қатынас соңғы жылдары жаңа деңгейге көтерілгенін атап өтті.
«Екіжақты байланыстарымыз бұрын-соңды болмаған деңгейге көтерілді. Біз Қазақстан-Қытай қарым-қатынасының жаңа “алтын отыз жылдығына” бірге қадам бастық. Елдеріміздің ықпалдастығы мүлде жаңа сапалық деңгейге шықты деп айтуға болады», – деді Қасым-Жомарт Тоқаев.
Президенттің айтуынша, екі ел халықтары арасында өзара сенім, достық қарым-қатынас және ортақ даму мақсаттарына негізделген берік байланыс қалыптасқан.
Сондай-ақ Мемлекет басшысы Қазақстан мен Қытай арасындағы стратегиялық серіктестікті нығайтуға ерекше үлес қосып келе жатқан Қытай Халық Республикасының Төрағасы Си Цзиньпинге алғыс білдірді.
Кездесу барысында тараптар сауда-экономикалық ынтымақтастықты кеңейту, инвестиция тарту және жаңа бірлескен жобаларды іске асыру бағыттары бойынша пікір алмасты.
