ТҮРКІСТАН: КЕЛЕС АУДАНЫНДА 250 ОРЫНДЫҚ ЗАМАНАУИ СПОРТ КЕШЕНІ ПАЙДАЛАНУҒА БЕРІЛДІ
Түркістан облысы Келес ауданына қарасты Абай ауылында елді мекен тұрғындары үшін маңызды әрі қуанышты оқиға орын алды.
«Ауыл – Ел бесігі» мемлекеттік жобасы аясында бой көтерген 250 орындық заманауи спорт кешені ресми түрде ашылып, халық игілігіне пайдалануға берілді. Бұл нысан ауылдық жерлерде спорт инфрақұрылымын дамытуға, бұқаралық спортты кеңінен насихаттауға және жастарды салауатты өмір салтына баулуға бағытталған жүйелі жұмыстың нақты нәтижесі саналады.
Спорт кешенінің ашылу салтанатына Түркістан облысының әкімі Нұралхан Көшеров арнайы қатысып, келестіктерді жаңа нысанның іске қосылуымен құттықтады. Облыс басшысы өз сөзінде Мемлекет басшысы Қасым-Жомарт Тоқаевтың бұқаралық спортты дамыту, халық денсаулығын нығайту жөніндегі тапсырмалары өңірде кезең-кезеңімен жүзеге асып жатқанын атап өтті. Оның айтуынша, соңғы жылдары Түркістан облысында спорт саласына ерекше көңіл бөлініп, қала мен ауыл арасындағы инфрақұрылымдық алшақтықты азайтуға басымдық берілуде.
– Бүгін Келес ауданы үшін тарихи әрі қуанышты күн. Заман талабына сай салынған жаңа спорт кешені ауыл тұрғындарына ғана емес, бүкіл аудан жастарына үлкен мүмкіндік сыйлайды. Президентіміз өз Жолдауларында бұқаралық спортты дамытуды, ұлт саулығын нығайтуды негізгі бағыттардың бірі ретінде айқындады. Осы тапсырма аясында өңірімізде спорт нысандары көптеп салынып жатыр. Ашылып отырған бұл кешен – соның айқын дәлелі. Бұл жерден болашақта ел намысын қорғайтын Олимпиада және әлем чемпиондары шығады деп сенемін, – деді Нұралхан Көшеров.
Жаңа спорт кешені «Ауыл – Ел бесігі» жобасы шеңберінде салынды. Бұл жоба ауылдық аумақтардың әлеуметтік жағдайын жақсартуға, инфрақұрылымды жаңғыртуға және ауыл тұрғындарының өмір сүру сапасын арттыруға бағытталған. Соңғы жылдары аталмыш жоба аясында Түркістан облысының көптеген елді мекендерінде мектептер, мәдениет үйлері, спорт залдары, жолдар мен инженерлік желілер жаңартылып, жаңа нысандар пайдалануға беріліп келеді.
Келес ауданындағы спорт кешенінің жобалық құны 1,8 миллиард теңгені құрайды. Нысан барлық заманауи талаптарға сай жабдықталған. Кешен ішінде 250 көрерменге арналған кең жарыс залы бар. Сонымен қатар волейбол, баскетбол, қазақ күресі, еркін күрес, бокс және аралас жекпе-жек түрлеріне арналған арнайы залдар қарастырылған. Бұл спорт кешенінде тек күнделікті жаттығулар ғана емес, аудандық, облыстық, тіпті республикалық деңгейдегі жарыстарды өткізуге толық мүмкіндік бар.
Ауыл жастары үшін мұндай кешеннің маңызы зор. Бұрын спортпен жүйелі түрде айналысу үшін аудан орталығына немесе қалаға қатынауға мәжбүр болған жастар енді өз ауылында кәсіби жаттықтырушылардың жетекшілігімен дайындала алады. Бұл, біріншіден, балалар мен жасөспірімдердің бос уақытын тиімді ұйымдастыруға ықпал етсе, екіншіден, құқықбұзушылықтың алдын алуға, салауатты өмір салтын қалыптастыруға жол ашады.
Айта кету керек, 2025 жылы Түркістан облысында спорт инфрақұрылымын дамыту бағытындағы жұмыстар бұрынғыдан да қарқынды жүргізілуде. Биыл өңір көлемінде 102 спорт нысанын салу жоспарланып, оған тиісті қаржы бөлінген. Қазіргі таңда соның 66-сының құрылысы толық аяқталып, ел игілігіне берілді. Олардың қатарында ескек есу каналы, 5 ірі спорт кешені, ондаған спорт залдары мен ашық спорт алаңдары, сондай-ақ футбол манеждері бар.
Облыста бұқаралық спортпен қатар кәсіби спортты дамытуға да ерекше мән беріліп отыр. Түркістан өңірінен шыққан спортшылар бүгінде ел намысын халықаралық ареналарда абыроймен қорғап жүр. Әлем және Азия чемпионаттарының жүлдегерлері, Олимпиада ойындарының қатысушылары қатарында түркістандық спортшылардың болуы – өңірде атқарылып жатқан жүйелі жұмыстың нәтижесі.
Сонымен бірге өңірде халықаралық және республикалық деңгейдегі спорттық жарыстар легі де үздіксіз ұйымдастырылуда. Мұндай жарыстар жергілікті жастардың спортқа деген қызығушылығын арттырып қана қоймай, туризмнің дамуына, өңірдің имиджін көтеруге оң әсерін тигізіп келеді. Жаңа спорт нысандарының көптеп салынуы Түркістан облысын еліміздегі спорт орталықтарының біріне айналдыруға мүмкіндік береді.
Келес ауданындағы жаңа спорт кешенінің ашылуы – ауыл спортының дамуына серпін беретін маңызды қадам. Бұл нысан алдағы жылдары талай жас спортшының шыңдалуына, олардың үлкен спортқа жол ашуына ықпал етпек. Өңір басшылығы спорт саласына қолдау көрсету, инфрақұрылымды жетілдіру бағытындағы жұмыстарды алдағы уақытта да жалғастыра беретінін атап өтті.
Осылайша, Абай ауылында пайдалануға берілген 250 орындық заманауи спорт кешені – мемлекет пен өңір басшылығының ауыл тұрғындарының денсаулығы мен болашағына бағытталған нақты қамқорлығының айқын көрінісі. Бұл нысан Келес ауданының әлеуметтік-экономикалық дамуына өз үлесін қосып, ауыл жастары үшін жаңа мүмкіндіктер алаңына айналары сөзсіз.
