ЖӘНІБЕК ӘЛІМХАНҰЛЫ КӘСІПҚОЙ БОКСТАН УАҚЫТША ШЕТТЕТІЛДІ
Қазақстандық танымал боксшы, кәсіпқой рингте өнер көрсетіп жүрген Жәнібек Әлімханұлы допингке қатысты іс бойынша тыңдаулар аяқталғанға дейін жекпе-жектерге қатысудан уақытша шеттетілді.
Бұл туралы Қазақстанның кәсіби бокс федерациясының президенті Рахымжан Ерденбеков мәлімдеді.
Федерация басшысының айтуынша, қазіргі таңда спортшыға қатысты допинг ісі қайта қаралу үстінде. Осыған байланысты халықаралық талаптарға сәйкес, тыңдаулар аяқталғанға дейін Жәнібек Әлімханұлының кәсіпқой бокстағы кез келген жекпе-жекке қатысуына тыйым салынған.
«Қайта қарау нәтижелері бойынша барлық жинақталған материалдар тиісті халықаралық ұйымдарға, соның ішінде World Boxing Organization (WBO), International Boxing Federation (IBF) және өзге де мүдделі тараптарға жолданады. Чемпиондық белбеулерге қатысты түпкілікті шешімді дәл осы ұйымдар қабылдайды. Ал әзірге, тыңдаулар аяқталғанға дейін Жәнібек Әлімханұлы жекпе-жектерге қатыса алмайды», – деді Рахымжан Ерденбеков.
Сондай-ақ ол бұл мәселеге қатысты соңғы әрі шешуші үкім халықаралық бокс ұйымдарының құзыретінде екенін атап өтті. Қазіргі уақытта чемпиондық белбеулерді сақтау немесе одан айыру мәселесі ашық күйінде қалып отыр.
Тыңдаулардың нақты қашан аяқталатыны жөнінде ресми ақпарат жарияланған жоқ. Істің нәтижесі белгілі болған соң, тиісті шешімдер қабылданып, қоғамға қосымша мәлімет берілмек.
Айта кетейік, Жәнібек Әлімханұлы – қазақстандық кәсіпқой бокстың ең танымал өкілдерінің бірі. Ол халықаралық аренада ел намысын қорғап, бірқатар беделді чемпиондық белбеулерге ие болған. Қазіргі жағдай спорт сүйер қауымның назарын аударып отыр.
