ЕРЕКШЕ КҮТІМДІ ҚАЖЕТ ЕТЕТІН ЖАНДАР ДЕМЕУШІЛЕРГЕ АЛҒЫС АЙТТЫ
Шымкентте жасы 18-ден асқан мүгедектігі бар жандарға арналған орталықтың ресми ашылу салтанаты болды. «Рақмет, саған, Анашым» орталығының жетекшілері мен жасөспірімдер қонақтарға дастархан жайып, өз өнерлерін көрсетті. Іс-шараға «Шымкент қаласының Азаматтық Альянсының» төрағасы Жұмағали Білісбеков, түрлі қоғамдық ұйымдардың жетекшілері, әнші Заттыбек Көпболсынұлы, жеткіншектер мен олардың ата-аналары қатысты.
– Ерекше күтімді қажет ететін балалар қоғамға етене араласуы керек. Басқа да жерлестеріміз осындай орталықтардың бар екенін білуі бағытындағы жұмыстарыңызға Азаматтық Альянс тарапынан қолдау көрсетеміз. Орталық жұмысына тек сәттілік, ал ата-аналарға төзімділік пен денсаулық тілейміз! – деді Жұмағали Дәулетбекұлы.
«Рақмет, саған, Анашым» қоғамдық қорының төрайымы Кенжетаева Алмагүлдің айтуынша, қор 2017 жылдан бері жұмыс істеп келеді. Ал жақында қалалық әкімдіктің, демеушілер мен қамқор жандардың қолдауымен осы ғимарат жөнделген. Күні бойы оңалуға жағдай жасалған орталық бүгінде жасы 18-ден асқан 12 адамға лайықталған. Тренажер құралдары мен демалатын бөлмелері бар. Мүмкіндігі шектеулі жандарды ата-аналары орталыққа таңертең алып келіп, кешке алып қайтады. Мұндай жандар орталыққа Жұмыспен қамту және әлеуметтік бағдарламалар басқармасының жолдамасымен келеді.
