«ҚАЙЫРЫМДЫЛЫҚ ПА, АЛАЯҚТЫҚ ПА?» – ПЕРИЗАТ ҚАЙРАТ ІСІНІҢ СОҢҒЫ СОТЫНДА НЕ БОЛДЫ?

Бұған дейін «қайырымдылықпен айналысты» деп танылған тұлға енді ірі көлемдегі қаржы жымқыру және заңсыз табысты жасыру бойынша жауапқа тартылып отыр. Соңғы сот отырысында бірқатар тосын шешімдер қабылданып, айыпталушылар мен куәгерлер арасында өткір диалогтар өрбіді. Сот барысы жабық форматқа көшіріліп, БАҚ өкілдеріне шектеу қойылды. Бұл – істің ауқымы бұрын ойлағаннан әлдеқайда терең екенінің белгісі.

Судья Сабыржан Каримовтың шешімімен медиа құралдары сот залынан шығарылып, куәгерлер мен айыпталушылар арасындағы диалогтар қоғамдық бақылаудан тыс жүргізіле бастады. Бұл шектеу Перизат Қайраттың жеке өмірі мен банктік операцияларына қатысты мәліметтердің жариялануын болдырмау мақсатында енгізілді.

Сол күні прокуратура айыптау актісін жария етті. Онда Перизат Қайрат пен анасы Гайни Алашбаева үш бірдей эпизод бойынша айыпталып отырғаны айтылды. Ең бастысы – жиналған қайырымдылық қаржысының мақсатсыз жұмсалуы. Прокурорлар мәліметіне сәйкес, қаражаттардың бір бөлігі элиталық тұрғын үйге, қымбат автокөлікке, тіс емдеуге, саяхат пен сәнді заттарға бағытталған. Ал бұл қаражат бастапқыда су тасқынынан зардап шеккендер мен мұқтаж жандарға көмек ретінде жиналған болатын.

Перизат Қайрат өз кезегінде тағылған айыппен келіспейтінін мәлімдеді. Ол: «Мен кінәмді мойындамаймын. Айыптаулар негізсіз, дәлелдер нақты емес», – деп жауап берді. Оның анасы да сот алдында өз кінәсін жоққа шығарды.

Сот барысында бірнеше куәгерден жауап алынды. Олардың қатарында Назарбаев зияткерлік мектебінің ата-аналар комитеті мен құрылыс компанияларының өкілдері бар. Куәгерлердің бірі қайырымдылық қорына 200 миллион теңгені әлеуметтік желідегі бейнеролик әсерімен аударғанын айтса, енді бірі нақты не үшін ақша бергенін білмегенін жеткізді.

Көпшілікті таңқалдырған тағы бір жайт – Перизат Қайраттың бұрын көлік сатқан әйелді “танымаймын” деуі. Ал куәгер керісінше, сол көлікті Перизаттың өзінен 30 миллион теңгеге сатып алғанын айтады.

Сот отырысы жалғасуда. Келесі кезеңде айыптаушы тарап жаңа дәлелдер ұсынбақ. Қоғам арасында бұл істің тек жеке тұлғаны емес, қайырымдылық саласының ашықтығы мен сенімділігіне де үлкен әсері болады деген пікірлер көбейіп келеді. Істің ақ-қарасы алдағы аптада анықталмақ.