Без рубрики
АБАЙ ОБЛЫСЫНДА ОҚУШЫЛАР ҚАУІПТІ САЙТТАРҒА КІРГЕН: 8 МЕКТЕП ДИРЕКТОРЫ ЖАУАПҚА ТАРТЫЛДЫ
Абай облысында жүргізілген тексеру барысында мектеп оқушыларының қауіпті интернет-ресурстарға еркін кіргені анықталды. Олардың қатарында суицидті насихаттайтын, зорлық-зомбылықты көрсететін және ересектерге арналған контенті бар сайттар болған.
Тексеру нәтижесінде бірқатар білім беру ұйымдарында интернет қауіпсіздігі талаптарының сақталмағаны белгілі болды. Оқушыларға арналған компьютерлерде арнайы қорғаныс жүйелері мен шектеулердің жеткіліксіз болғаны айтылды.
Аталған заңбұзушылықтарға байланысты облыстағы 8 мектептің директоры әкімшілік жауапкершілікке тартылып, оларға айыппұл салынды.
Қазіргі уақытта барлық мектептерде қауіпті интернет-ресурстар бұғатталып, қауіпсіздік шаралары күшейтілген. Сондай-ақ білім беру мекемелеріне оқушылардың интернетке кіруін бақылауды қатаңдату жөнінде тапсырмалар берілген.
Мамандар балалардың интернеттегі қауіпсіздігіне ата-аналар мен мектеп әкімшілігі бірдей жауапты екенін еске салып, киберқауіпсіздік талаптарын сақтауға шақырды.
