ТҮРКІСТАН ОБЛЫСЫНДА ҚАЗАҚСТАН ЧЕМПИОНЫ ЗАУЫТТА ҚАЗА ТАПТЫ
Түркістан облысында кафель өндіретін зауытта 28 жастағы спортшы Тілектес Әділ қаза тапты. Ол есту қабілеті бұзылған спортшылар арасында күрестен Қазақстан чемпионы атанған.
Алдын ала мәлімет бойынша, қайғылы оқиға спортшы жұмыс істеген өндіріс орнында болған. Тілектестің досының айтуынша, жұмыс барысында ол абайсызда электр сымына тиіп кеткен. Салдарынан электр тогы соғып, кейін биіктіктен құлаған.
Оқиға орнына жедел жәрдем қызметкерлері шақырылған. Алайда медицина мамандары спортшының өмірін сақтап қала алмаған.
Тілектес Әділ грек-рим және еркін күреспен айналысып, есту қабілеті бұзылған спортшылар арасындағы жарыстарда ел намысын қорғаған. Ол спорттық мансабында бірнеше республикалық және халықаралық додаларда жүлдеге ие болған.
2018 жылы Ақтөбе қаласында өткен Қазақстан спартакиадасында грек-рим күресінен 55 келіге дейінгі салмақта жеңімпаз атанды. Ал 2019 жылы Қостанайда ұйымдастырылған жарыста 60 келіге дейінгі салмақта алтын медаль иеленді.
Спортшының жарыстардағы жетістіктері оның ел чемпионаттарында тұрақты түрде жоғары нәтиже көрсеткенін аңғартады. Ол еңбекпен қатар спортты қатар алып жүріп, өзінің табандылығымен ерекшеленген.
Тілектес Әділ 1998 жылы дүниеге келген. Оның артында жары мен екі баласы қалды.
Қайғылы оқиғаның нақты себептері мен өндірістегі еңбек қауіпсіздігі талаптарының сақталуы тиісті тексеру барысында анықталатын болады.
