ОҚУШЫЛАР МӘНЕРЛЕП ОҚУДАН ЖАРЫСТЫ
Тәуелсіздік сан ғасырлар бойы ата-бабаларымыз үшін асыл мұратқа айналды. Сол мұратқа қол жеткізген біздің ұрпаққа одан асқан байлық жоқ, оған теңдес тірек жоқ. Елбасының бастамасымен осы жылдарда жастардың мәселелері жүйелі түрде шешіліп келді, оның жалғасы ретінде 2019 жыл «Жастар жылы» деп аталып өтті. Мемлекет басшысы Қасым-Жомарт Тоқаев жастар саясатына арналған «Тәуелсіздік ұрпақтары» атты біртұтас ұлттық жоба әзірлеуді тапсырды. Былтыр Волонтер жылын абыроймен атқарып шықтық. Президенттің кадрлық резерві жасақталды. Биыл жергілікті мемлекеттік органдарды бағалау көрсеткішіне «Жастардың даму индексі» қосылады. Осының өзі кейінгі кезде жастарды қолдауға ерекше назар аударыла бастағанын аңғартса керек.
Шымкент қалалық білім басқармасына қарасты А.Байтұрсынов атындағы N50 мектеп- гимназиясында Тәуелсіздіктің 30 жылдығына арналған 30 іс -шара жоспары аясында қазақ тілі пәні әдістеме бірлестігінің ұйымдастыруымен 5-11 сынып оқушылары арасында «Тұғыры биік Тәуелсіздік!» атты мәнерлеп оқу сайысы өткізілді. Сайыс соңында жеңімпаз оқушылар марапатталды.
