ТҮРКІСТАНДА АУЫЛДЫҚ МӘДЕНИЕТ ҮЙЛЕРІ МЕН КШУБТАРЫНА АРНАЛҒАН БАЙҚАУ ӨТУДЕ
Түркістанда «Ауыл – мәдениеттің бастауы» атты облыстық байқауы басталды. Алғашқы болып Сарыағаш аудандық мәдениет үйіне қарасты 16 ұжым өз жұмысын қорғап жатыр.
Түркістан облыстық мәдениет және халық шығармашылығы орталығының ұйымдастыруымен өтіп жатқан байқауға жалпы 200-ге тарта ауылдық мәдениет үйлері мен клубтар қатысуда.
Аталған байқау халыққа заманауи мәдени қызмет көрсету шараларын жақсартуға, мәдениет мекемелерінің жұмыс сапасын арттыру мен халық шығармашылығын дамытуға және ауылдық мәдениет мекемелерінің жұмысына қолдау көрсетуге бағытталған. Оған Облыстық мәдениет және халық шығармашылығы орталығының директоры, ҚР Мәдениет саласының үздігі Мейіржан Алиакбаров пен осы орталықтың «Мәдени-демалыс жұмыстарын ұйымдастыру» бөлімінің жетекшісі Мұрат Жұманов пен мәдени ұйымдастырушы маманы, ҚР Мәдениет саласының үздігі Зағипа Өмірзақова қазылық етеді. Байқаудың талаптары мен шарттарына сәйкес қазылар алқасы ауылдық мәдениет үйлері мен клубтардың жұмысын жақсартуға байланысты барлық мүмкіндікке баға береді.
Байқау барысында олардың көрнекі үгіт құралдары, атқарылған жұмыстары мен іс-шаралар жоспарының орындалуы, іс-құжаттардың жүргізілуі, жергілікті жерлерде халық шығармашылығының жанрлары бойынша түрлі байқаулар мен фестивалдердің ұйымдастырылуы ескеріледі. Сонымен қатар аудандық, облыстық, республикалық, халықаралық түрлі байқаулар мен фестивалдерге қатысуы, көрермен залы, үйірме бөлмелері мен сахнасы, фойесі, байқауға лайықты безендірілуі, мәдениет ошағындағы іс-құжаттарының жүргізілуі, жалпы жоспарларына, өткізілген мәдени іс-шаралардың сценарийіне, бағдарламаларына баға беріледі. Сондай-ақ мәдениет ошағының материалдық-техникалық базасы: музыкалық аспаптар, дыбыс күшейткіш аппаратуралар, ұлттық сахналық киімдер және басқа да керекті құрал-жабдықтармен қамтамасыз етілуі, сахнаның жабдықталуына тағы басқа баса назар аударады.
Айта кетейік, байқау «Конгресс Холл» көпсалалы кешенінің конференция залында жалғасады. Онда күнделікті әр ауданнан келген қатысушылар 40 беттен тұратын 5 минуттық таныстырылым жүргізеді. Байқау жеңімпаздарына бас жүлде, I, II, III дәрежелі жүлде қорлары және арнайы жүлделер табысталады.
