ЖАСТЫҚТЫҢ ЖАЛЫНЫ МЕН ҰЛАҒАТТЫҢ ҮНІ: ТӨЛЕБИДЕГІ ТАҒЫЛЫМДЫ КЕЗДЕСУ
Төлеби өңірі – қашанда тағылым мен тәрбиенің, білім мен парасаттың алтын ұясы саналған қасиетті мекен.
Бұл топырақтан елге қызмет еткен талай дарынды тұлғалар мен ұлт руханиятына өлшеусіз үлес қосқан азаматтардың шығуы – өңірдің рухани әлеуетінің айқын көрінісі. Осындай өнегелі өлкенің бүгінгі жас буынына дұрыс бағыт-бағдар беру, олардың бойына ұлттық құндылықтарды сіңіріп, ертеңгі күнге деген сенімін нығайту – қоғам алдындағы маңызды міндеттердің бірі. Осы мақсатта Төлеби аудандық білім бөліміне қарасты №8 жалпы білім беретін мектебінде ұйымдастырылған «Қарымды қаламгер, рухты сана, биік арман» атты шығармашылық кездесу жас ұрпақтың рухани әлемін байытып, тағылым мен тәрбиеге толы мазмұнды басқосуға айналды.
Мектеп қабырғасында өткен бұл кездесу – жай ғана кезекті шара емес, оқушылардың өмірлік ұстанымына әсер етіп, болашаққа деген көзқарасын қалыптастыруға бағытталған маңызды рухани алаң болды. Әсіресе мектеп бітіруші түлектер мен жоғары сынып оқушылары үшін мамандық таңдау, өмірлік мақсат айқындау, қоғамда өз орнын табу мәселелері аса өзекті кезеңде мұндай кездесудің маңызы ерекше екені анық. Сондықтан да кештің негізгі мақсаты – жастарға бағыт-бағдар беру, ел дамуына өзіндік үлес қосып жүрген азаматтардың өмір жолын үлгі ету және жас буынның бойындағы жігер мен сенімді ояту болды.
Шараның салтанатты әрі мазмұнды өтуіне арнайы шақырылған қонақтардың да қосқан үлесі зор. Кеш қонақтары қатарында «Төлеби таңы» газетінің редакторы Хангелді Дина Бағланқызы, Ленгір қаласының әкімі Мақсат Жұмабаев, Төлеби аудандық мәслихатының депутаты Мақсат Тұрымбетов және қала әкімдігінің қызметкері Камила Заманқызы болды. Өз саласында жетістікке жетіп, қоғамдық өмірде белсенділік танытып жүрген бұл азаматтардың әрқайсысы жастарға тағылымды ой айтып, өмірлік тәжірибелерімен бөлісті.
Кездесу барысында Хангелді Дина Бағланқызы қалам құдіреті, журналистиканың қоғамдағы рөлі және ақпарат кеңістігіндегі ұлттық мүдденің маңызы туралы әсерлі ой қозғады. Ол жастарды шындық пен әділдікті ту етіп, қандай жағдайда да адамдық ұстанымнан айнымауға шақырды. Сонымен қатар қазіргі ақпарат тасқыны заманында сауатты ойлау мен дұрыс ақпаратты саралай білудің маңызы ерекше екенін атап өтті.
Ал Ленгір қаласының әкімі Мақсат Жұмабаев мемлекеттік қызметтің жауапкершілігіне тоқталып, елге адал қызмет ету – үлкен сенім мен табандылықты талап ететінін жеткізді. Өз сөзінде ол бүгінгі мектеп партасында отырған оқушылар – ертеңгі ел тағдырын шешетін азаматтар екенін ерекше атап өтті. Мәслихат депутаты Мақсат Тұрымбетов те жастарға адал еңбек пен білімнің арқасында ғана биік белестерді бағындыруға болатынын айтып, қоғамдық белсенділік пен елжандылықтың маңызын түсіндірді. Ал жас маман Камила Заманқызы қазіргі заман талабына сай болу үшін үздіксіз даму, жаңа технологияларды меңгеру және уақытпен бірге ілгерілеу қажеттігін тілге тиек етті.
Кездесудің ең әсерлі бөлігі – қонақтар мен оқушылар арасындағы еркін сұхбат алаңы болды. Ашық форматта өткен пікір алмасу барысында оқушылар көкейлеріндегі сауалдарын қойып, болашақ мамандық, білім алу, өмірлік таңдау мен жетістікке жетудің жолдары жөнінде тұщымды жауаптар алды. Қонақтар өздерінің мектептегі қызықты сәттерін, алғашқы еңбек жолындағы қиындықтарын және сол кезеңдерден алған өмірлік сабақтарын шынайы түрде бөлісті. Бұл әңгімелер жастарға ерекше әсер сыйлап, олардың бойындағы мақсатқа ұмтылу сезімін арттыра түсті.
Кеш барысында қазіргі қоғамдағы басты талаптардың бірі – жан-жақтылық мәселесі де кеңінен сөз болды. Қонақтар бүгінгі жаһандану дәуірінде тек бір бағытпен шектеліп қалмай, білім мен өнерді, ғылым мен спортты қатар алып жүрудің маңызын айтты. Уақытты тиімді пайдалану, үздіксіз іздену, жаңа технологияларды меңгеру және бәсекеге қабілетті тұлға болу жайында айтылған құнды пікірлер оқушылардың санасына ой салды.
Сонымен қатар өмір жолында кездесетін қиындықтар мен кедергілердің адамды шыңдайтыны, қандай жағдайда да жігерді жоғалтпай, алға ұмтылу қажеттігі ерекше айтылды. Қонақтар табандылық пен еңбекқорлықтың арқасында ғана үлкен жетістіктерге жетуге болатынын нақты мысалдармен түсіндірді. Рухты сана мен биік арман адамды кез келген тығырықтан алып шығатын қуатты күш екені жастардың жүрегіне сенім ұялатты.
Осындай мазмұнды кездесулер – жас ұрпақтың тұлғалық қалыптасуына ықпал ететін маңызды рухани шаралардың бірі. Өйткені бүгінгі жастарға тек білім беру жеткіліксіз, олардың бойына адамгершілік, елжандылық, жауапкершілік пен еңбекқорлық секілді асыл қасиеттерді сіңіру де аса маңызды. Төлеби төрінде өткен бұл тағылымды кеш – жас буынның жүрегіне үміт отын жағып, олардың болашаққа деген сенімін нығайтқан жарқын жүздесу болды. Мұндай игі шаралар өскелең ұрпақтың саналы, білімді әрі рухы биік азамат болып қалыптасуына өз үлесін қоса беретіні сөзсіз.
