ТӨЛЕБИ АУДАНЫНЫҢ ДАМУ БАҒЫТЫ АЙҚЫНДАЛДЫ

Алқалы жиынға аудандық мәслихат төрағасы Нұрлан Қойбағаров төрағалық етті. Сессия жұмысына аудан әкімі Еркеғали Әлімқұлов, аудан әкімінің орынбасары Ғалымжан Төлегенов, мәслихат депутаттары, қала және ауылдық округ әкімдері, бөлім басшылары мен жауапты сала мамандары қатысты.

Ресми отырыс басталар алдында ауданның қоғамдық-саяси және әлеуметтік-экономикалық дамуына елеулі үлес қосып жүрген бірқатар азаматтарға құрмет көрсетілді. Түркістан облыстық және аудандық мәслихаттарының Құрмет грамоталары табысталып, ел игілігі жолында еңбек етіп жүрген мамандардың еңбегі жоғары бағаланды. Бұл – өңірдің өркендеуіне қызмет етіп жүрген азаматтарды қолдауға бағытталған игі дәстүрдің жалғасы.

Кезекті сессияның күн тәртібіне ауданның әлеуметтік-экономикалық ахуалына, қаржы-бюджет саясатына және халықты әлеуметтік қолдау шараларына қатысты тоғыз маңызды мәселе енгізілді. Депутаттар алдымен 2025 жылғы жергілікті бюджеттің атқарылуы жөніндегі есепті қарап, бюджет қаржысының игерілу деңгейі мен тиімділігіне жан-жақты талдау жасады. Сонымен қатар, алдағы кезеңдегі негізгі міндеттерді ескере отырып, 2026–2028 жылдарға арналған аудандық бюджетке өзгерістер мен толықтырулар енгізу мәселесі кеңінен талқыланды.

Сессия барысында жергілікті атқарушы органдардың ашықтығы мен есептілігін арттыру мәселесіне де айрықша назар аударылды. Атап айтқанда, Қасқасу және Киелітас ауылдық округтері әкімдерінің есептері тыңдалып, елді мекендердегі инфрақұрылым, абаттандыру, әлеуметтік нысандардың жұмысы және тұрғындардың әл-ауқатын жақсарту бағытында атқарылған жұмыстар сараланды. Депутаттар тарапынан ауылдық округтердің даму қарқынына қатысты ұсыныстар айтылып, бірқатар нақты міндеттер жүктелді.

Халықты әлеуметтік қолдау мәселелері де сессия күн тәртібіндегі өзекті тақырыптардың бірі болды. Депутаттар әлеуметтік осал топтарға көмек көрсету қағидаларын жетілдіру, нақты мұқтаж азаматтардың санаттарын айқындау және осы бағыттағы арнайы комиссия құрамын бекіту туралы мәселелерді мақұлдады. Бұл шешімдер аудан тұрғындарына көрсетілетін әлеуметтік көмектің тиімділігі мен әділдігін арттыруға бағытталған.

Сонымен қатар, ауылдық елді мекендердегі кадр тапшылығын азайту мақсатында маңызды шешім қабылданды. Мәслихат депутаттары ауылдық жерлерге жұмыс істеуге баратын жас әрі білікті мамандарға 2026 жылы берілетін көтерме жәрдемақы көлемін бекітіп, олардың тұрғын үй мәселесін шешуге арналған бюджеттік кредит беру бастамасын бірауыздан қолдады. Бұл бастама әсіресе білім, медицина, мәдениет және әлеуметтік сала мамандарын ауылға тартуға мүмкіндік бермек.

Жиында сөз сөйлеген аудан әкімі Еркеғали Әлімқұлов ауылдық округ әкімдерінің есептеріне жеке тоқталып, алдағы кезеңде атқарылатын жұмыстардың негізгі бағыттарын айқындады. Аудан басшысы ауыл шаруашылығы мен өндіріс салаларындағы көрсеткіштерді арттырумен қатар, Төлеби өңірінің табиғи әлеуетін тиімді пайдалану арқылы туризм саласын дамытуға басымдық беру қажеттігін атап өтті. Сондай-ақ, барлық инвестициялық және инфрақұрылымдық жобалардың сапалы әрі мерзімінде орындалуы қатаң бақылауда болатынын жеткізді.

Сессия қорытындысында депутаттар тарапынан айтылған ұсыныстар ескеріліп, күн тәртібіндегі барлық мәселелер бойынша тиісті шешімдер қабылданды. Қабылданған құжаттар алдағы уақытта Төлеби ауданы экономикасының тұрақты дамуына серпін беріп, тұрғындардың өмір сүру сапасын жақсартуға және өңірдің әлеуетін арттыруға негіз болмақ.