ҚАЗАҚСТАНДЫҚТАР ТАИЛАНДТА ВИЗАСЫЗ 30 КҮН ҒАНА БОЛА АЛАДЫ
Қазақстан азаматтарының Таиландта визасыз болу мерзімі қысқарады. Жаңа тәртіп бойынша қазақстандықтар ел аумағында бір сапар кезінде 30 күнге дейін ғана визасыз жүре алады.
Бұған дейін Қазақстан азаматтарына Таиландта визасыз 60 күнге дейін болуға мүмкіндік берілген еді. Енді бұл мерзім екі есеге қысқарып отыр.
Сонымен қатар жаңа талап бойынша шетел азаматтары алты ай ішінде Таиланд аумағында жалпы 90 күннен артық бола алмайды. Яғни елге бірнеше рет барған жағдайда әр сапардағы күндер жинақталып есептеледі.
Мысалы, Қазақстан азаматы Таиландқа үш рет сапарлап, әрқайсысында 30 күннен болса, алты айлық кезеңдегі жалпы болу мерзімі 90 күнді құрайды. Осы межеге жеткеннен кейін аталған кезең ішінде елге қайта визасыз кіруге шектеу қойылады.
Жаңа тәртіп Таиландқа визасыз кіре алатын 90-нан астам елдің азаматтарына қатысты енгізіліп отыр. Қазақстан азаматтары да өзгеріс қамтитын елдер қатарында.
Сондықтан Таиландқа сапар жоспарлаған қазақстандықтарға жаңа талаптарды ескеріп, елде болу мерзімін алдын ала есептеу маңызды.
