ОТАН ҮШІН ОТ КЕШКЕНДЕР

Түркістан облысы, Ордабасы ауданы С.Сейфуллин атындағы жалпы орта мектепте 7-9 мамыр Отан қорғаушылар күні және Ұлы Жеңіс күніне орай іс-шаралар өткізілді.

Мектеп директоры, «Nur Otan» партиясының «Ардагерлерді ардақтайық» жобасы аясында фракция мүшесі, Ордабасы аудандық мәслихат депутаты ретінде Сауле Омаш Шапайқызы «Ұлы Отан» соғысының ардагері Мұратов Қалмен атамызды Жеңістің 76 жылдығымен арнайы құттықтады.

«Есімі елге ұран» болатындай атамыздың ерлігін кейінгі ұрпаққа таныстыру және оқушы жастардың бойына отансүйгіштік қасиеттерін ояту мақсатында 5 – сынып оқушыларынан жасақталған «Адал ұрпақ» клубының жас өрендері де барып, батыр атамыздың ерлігін өз ауызынан естіп, батасын алып қайтты.

9 мамыр – Жеңіс күні – ең қымбатты, қуанышты да қайғылы, мәртебелі мейрам, халқымыздың ерлігі мен даңқының жарқын көрінісі болып табылады. 1945 жылдың 9 мамыры… Жылдан-жылға алыстап бара жатқан мерзім. Дейтұрғанмен, Ұлы Жеңістің анық бағасы мен маңызы біздің жадымызда мәңгі орын алған деуге болады. Ұлы Жеңіс тойы – бұрынғы кеңестік халықтардың ортақ, басты мерекелерінің бірі.
Жыл сайын мәңгілік алауы жанына Отан қорғаушыларын, батырларды еске алып, гүл шоқтарымен рахметін айта келгендер жиналады. Біздер де қадірлі ардагерлерге бейбіт өміріміз бен бақытты болашағымыз үшін алғысымызды білдіреміз.