ТӘУЕЛСІЗ ЕЛДІҢ АЗАТ ҰРПАҚТАРЫ МОЛ САБАҚ АЛУЫ ТИІС

Елбасы Нұрсұлтан Әбішұлы Назарбаев қазақ халқының басынан бағы тайған сан қилы тарихын, ұлт болашағының жарқын болуы, тәуелсіздігіміздің баянды болуы жолында отқа да, суға да түсіп жүріп қызмет еткен кездерін, басқа түскен барлық қиыншылықты мойымай көтерген күндерін, тағылымы мол тарихи істерін «Тәуелсіздік тағылымы» атты мақаласында жариялап отыр. Бұл – мақала Тәуелсіз елдің азат ұрпақтары мол сабақ алатын материал.

Кез келген елдің тарихында тәуел­сіз­дік оңай келе қойған жоқ. Тәуел­сіздік үлкен күреспен, қанмен келеді. «Азат еліміздің жастары тәуелсіздікке барар жолдың қандай азапты болғанын, қандай құрбандықтар мен сынақтар – 1916 жылғы ұлт-азаттық көтеріліс, азамат соғысы, ашаршылықтың алапат екі толқыны, қуғын-сүргін мен реп­рес­сиялар, Ұлы Отан соғысы, тың игеру жылдарындағы жаппай қоныс аударудың зардабы арқылы жеткені­мізді білуі керек. Мұның өзі өткен тарихты қастер­леп, одан сабақ алу үшін қажет. Менің «Тәуелсіздік – бабалар қанымен келген киелі құндылық» дейтінім осыдан», дейді Елбасы Нұр­сұлтан Әбішұлы «Тәуелсіздік тағы­лымы» мақаласында.

Н.Назарбаев ел тізгінін қолына алма­ғайып, аумалы-төкпелі, қиын кезеңде алды. Ел бірлігін егемен­дігіміздің туы етіп көтерді. Тарихтың да, тағдырдың да сынынан абыроймен өтіп, халқын да қыл көпірден, жанып тұрған өрттен аман алып шықты.

Тәуелсіздік алғанымызға 30 жыл болды. Заман, қоғам өзгерді, адам өзгер­­ді, ой-сана өзгерді; мемлекет­тігіміз қалып­тасты, экономикамыз нығайды, демократия орнықты, бізді әлем таныды.