САЙРАМ АУДАНЫНДА ЖАСТАР АРАСЫНДА СЫБАЙЛАС ЖЕМҚОРЛЫҚҚА ҚАРСЫ СУРЕТ САЛУ БАЙҚАУЫ ӨТТІ

Бұл ретте жастардың көзқарасын дұрыс бағытта қалыптастыру, олардың санасына парасаттылық пен жауапкершілік құндылықтарын сіңіру аса маңызды. Осы бағытта Сайрам ауданында жастардың белсенділігін арттыруға арналған мазмұнды әрі тағылымды іс-шара ұйымдастырылды.

Сайрам аудандық ішкі саясат бөлімі мен «Қоғамдық келісім» КММ-нің Сайрам аудандық филиалының бірлескен жоспары аясында Ақсукент ауылында орналасқан орталық саябақта «Біз сыбайлас жемқорлыққа қарсымыз» тақырыбында сурет салу байқауы өтті. Ашық аспан астында өткен бұл байқау аудан жастарын бір ортаға топтастырып, адалдық пен әділ қоғам құру идеяларын көркем өнер арқылы жеткізуге мүмкіндік берді.

Байқаудың басты мақсаты – жастардың бойында адалдық, парасаттылық, әділдік сияқты адамгершілік құндылықтарды нығайту, сондай-ақ сыбайлас жемқорлыққа қарсы саналы көзқарас қалыптастыру болды. Шараға Сайрам ауданынан 33 жас суретші қатысып, әрқайсысы өз туындысында қоғамдағы әділетсіздікке қарсылықты, таза еңбектің қадірін, заңға құрмет пен азаматтық жауапкершілікті бейнелеуге тырысты. Ұсынылған жұмыстардың мазмұны мен көркемдік деңгейі жастардың бұл мәселеге бейжай қарамайтынын айқын көрсетті.

Әрбір салынған сурет – үлкен ойдың, терең мағынаның көрінісі болды. Кейбір туындыларда адалдықтың жарық жолы мен жемқорлықтың қараңғы салдары салыстырмалы түрде бейнеленсе, енді бір жұмыстарда әділ қоғамда өмір сүретін бақытты ұрпақтың болашағы суреттелді. Бұл жастардың сыбайлас жемқорлыққа қарсы күресте өз ұстанымы бар екенін және қоғамға өз үнін жеткізе алатынын аңғартты.

Байқау соңында қазылар алқасы қатысушылардың шығармашылық ізденісін, тақырыпты ашу деңгейін және көркемдік шешімдерін ескере отырып жеңімпаздарды анықтады. Нәтижесінде бірінші орынды Кенесары Гүлназ иеленсе, екінші орын Орынбек Ақниетке, үшінші орын Далибаева Асемге бұйырды. Сонымен қатар Сабитқызы Жанайым, Мирзаметова Сайда және Серік Аяулым белсенділігі мен ерекше идеялары үшін ынталандыру сыйлықтарымен марапатталды.

Бұл байқау жастардың шығармашылық әлеуетін ашып қана қоймай, олардың қоғамдағы маңызды мәселелерге азаматтық көзқарасын қалыптастыруға ықпал етті. Осындай тағылымды шаралар арқылы адалдықты ту еткен, әділдікті өмірлік ұстанымына айналдырған жас ұрпақ тәрбиеленіп, елдің болашағы берік негізде қалыптасатыны анық.