СИАНЬДАҒЫ ҚАЗАҚСТАННЫҢ БАС КОНСУЛДЫҒЫ ӨҢІРАРАЛЫҚ ИНВЕСТИЦИЯЛЫҚ ЫНТЫМАҚТАСТЫҚТЫ НЫҒАЙТУДА МАҢЫЗДЫ РӨЛ АТҚАРУДА

Іс-шараға 300-ден астам отандық және шетелдік компаниялардың, ірі инвесторлар мен бизнес қауымдастық өкілдерінің қатысуы Түркістан облысының экономикалық дамудағы жаңа кезеңге қадам басқанын айқын көрсетті. Аталған форумды ұйымдастыруда және шетелдік инвесторларды тартуда Қазақстан Республикасының Сиань қаласындағы Бас консулдығының қолдауы ерекше рөл атқарды.

Форумға Қытай Халық Республикасының Шэньси, Сычуань және Хубэй провинцияларынан келген ресми және бизнес делегациялар қатысып, бұл өз кезегінде Қазақстан мен Қытай арасындағы өңіраралық экономикалық байланыстардың нығайып келе жатқанын аңғартты. Делегациялардың Түркістанға келуіне Сианьдағы Қазақстанның Бас консулдығы тікелей ықпал етіп, қытайлық инвесторлар үшін өңірдің мүмкіндіктерін алдын ала таныстыру жұмыстарын жүргізген.

Форум аясында ауыл шаруашылығы және агроөңдеу, құрылыс материалдарын өндіру, логистика, туризм, сондай-ақ кадр даярлау салаларындағы негізгі инвестициялық бағыттар жан-жақты таныстырылды. «Түркістан – Қазақстанның жаңа инвестициялық циклінің драйвері» тақырыбымен өткен пленарлық отырыста өңірдің географиялық орналасу артықшылықтары, табиғи ресурстары, инфрақұрылымдық әлеуеті және инвесторларға ұсынылатын қолдау тетіктері кеңінен баяндалды. Бұл бағыттар Түркістан облысының тек аймақтық емес, халықаралық деңгейдегі инвестициялық орталыққа айналуына негіз бола алатыны атап өтілді.

Форумның спикерлері қатарында Қазақстан Республикасының Сиань қаласындағы Бас консулы Жошыхан Қыраубаев, Қытай Халық Республикасының Қазақстандағы Төтенше және Өкілетті Елшісі Хань Чуньлинь, сондай-ақ қытай провинцияларының ресми өкілдері мен ірі компания басшылары сөз сөйледі. Өз баяндамасында Жошыхан Қыраубаев Сиань қаласында орналасқан қазақстандық құрғақ порттың маңызын ерекше атап өтті. Оның айтуынша, бұл логистикалық нысан Қазақстан мен Қытай арасындағы тауар айналымын арттыруда, сондай-ақ Орталық Азия мен Еуропа нарықтарына шығуда стратегиялық рөл атқарып отыр.

Сонымен қатар, қазақ дипломаты қазақстандық және әсіресе оңтүстік өңірлерде өндірілетін өнімдерді Қытай нарығына ілгерілету мақсатында Сиань және Чэнду қалаларында «Оңтүстік өңірдің Сауда үйін» ашу бастамасын ұсынды. Бұл ұсыныс қытайлық кәсіпкерлер тарапынан қызығушылық тудырып, алдағы уақытта нақты жобаларға ұласуы мүмкін екені айтылды. Мұндай сауда алаңдары қазақстандық өнімдердің танымалдығын арттырып, екі ел арасындағы сауда-экономикалық байланыстарды жаңа деңгейге көтеруге мүмкіндік береді.

Форум аясында ұйымдастырылған өңіраралық кездесулер мен B2B форматындағы келіссөздер инвесторлар үшін аса тиімді болды. Шетелдік компания өкілдері Түркістан облысының аудан әкімдерімен, салалық басқарма басшыларымен және жергілікті кәсіпкерлермен тікелей байланыс орнатып, нақты инвестициялық жобаларды талқылады. Атап айтқанда, бірқатар қытайлық компаниялар Түркістан облысындағы арнайы экономикалық аймақ аумағында өз өкілдіктерін ашуға және өндіріс орындарын орналастыруға дайын екендерін білдірді.

Келіссөздер барысында ауыл шаруашылығы өнімдерін терең өңдеу, заманауи жылыжай кешендерін салу, құрылыс материалдарын шығару, логистикалық орталықтар құру және туристік инфрақұрылымды дамыту жобалары ерекше назарға алынды. Инвесторлар Түркістан облысында жасалып отырған қолайлы инвестициялық климатты, инфрақұрылымның дайын екенін және жергілікті атқарушы органдар тарапынан көрсетілетін қолдауды жоғары бағалады.

Форум қатысушылары іс-шараның жоғары деңгейде ұйымдастырылғанын, пікір алмасуға және нақты келісімдер жасауға қолайлы алаң болғанын атап өтті. Олардың айтуынша, мұндай халықаралық форумдар өңірлер арасындағы өзара сенімді нығайтып, ұзақ мерзімді серіктестікке жол ашады. Түркістан облысы өз тарапынан инвесторларға жан-жақты қолдау көрсетуге дайын екенін тағы да нақтылады.

Жалпы алғанда, «Turkistan Investment and Tourism Forum – 2025» халықаралық инвестициялық форумы Түркістан облысының инвестициялық әлеуетін халықаралық деңгейде танытуда маңызды қадам болды. Бұл ретте Қазақстан Республикасының Сиань қаласындағы Бас консулдығының белсенді жұмысы, қытайлық өңірлермен орнатқан тығыз байланыстары және инвесторларды тартудағы жүйелі қолдауы өңіраралық инвестициялық ынтымақтастықтың нығаюына нақты серпін берді. Алдағы уақытта мұндай бастамалар Қазақстан мен Қытай арасындағы экономикалық әріптестікті одан әрі тереңдетіп, Түркістан өңірінің тұрақты дамуына ықпал ететіні сөзсіз.