МҰНАЙ БАҒАСЫ 2025 ЖЫЛДАН БЕРГІ ЕҢ ЖОҒАРЫ ДЕҢГЕЙГЕ ЖЕТТІ
Таяу Шығыстағы әскери-саяси ахуалдың күрт шиеленісуі жаһандық энергия нарығына тікелей әсер етті. Соңғы күндері мұнай бағасы 2025 жылдың басынан бергі ең жоғары көрсеткішіне дейін көтерілді.
Сарапшылар бұл өсімді аймақтағы геосаяси тәуекелдердің артуымен байланыстырады.
Геосаяси фактор нарықты «қыздырды»
Иран мен Израиль арасындағы қарулы қақтығыстың жаңа кезеңге өтуі және АҚШ-тың әскери операция бастауы туралы хабарлар инвесторлар арасында алаңдаушылық тудырды. Әсіресе, мұнай тасымалы өтетін стратегиялық бағыттардың қауіпсіздігіне қатысты қауіп күшейді.
Нәтижесінде «қара алтын» құны бір күн ішінде шамамен 7 пайызға қымбаттады.
Қазіргі баға қандай?
Сауда-саттық нәтижелері бойынша:
Brent маркалы мұнай барреліне 78–82 доллар аралығында саудалануда;
WTI маркалы мұнайдың бағасы 71–75 доллар деңгейіне жетті.
Астана уақытымен таңғы сағат 09:00-дегі мәліметке сәйкес, мұнай құны 77,13 долларды көрсетіп, өсім динамикасын жалғастырып отыр.
Нарыққа ықпалы қандай?
Сарапшылардың пікірінше, егер Таяу Шығыстағы шиеленіс одан әрі ушыға түссе, мұнай бағасы тағы да көтерілуі мүмкін. Бұл өз кезегінде жанармай құнына, инфляция деңгейіне және импортқа тәуелді елдердің экономикалық тұрақтылығына әсер етуі ықтимал.
Қазіргі жағдайда нарық қатысушылары аймақтағы әскери әрекеттердің ауқымын, сондай-ақ ірі мұнай өндіруші елдердің позициясын жіті бақылап отыр.
Энергия нарығындағы ахуалдың қалай өрбитіні алдағы күндері белгілі болмақ.
