ТОҚАЕВ ВИЦЕ-ПРЕЗИДЕНТ 10 КҮН ІШІНДЕ БЕЛГІЛІ БОЛАТЫНЫН АЙТТЫ
Президент Қасым-Жомарт Тоқаев Қазақстанда жаңадан енгізілген Вице-президент лауазымына кім тағайындалатынын алдағы он күн ішінде жариялайтынын айтты.
Мемлекет басшысы бұл туралы журналистердің сұрағына жауап беру кезінде мәлімдеді.
Президенттің айтуынша, Вице-президент лауазымын Конституцияға енгізу – елдің саяси жүйесіндегі маңызды өзгерістердің бірі. Бұл қызметтің қазіргі кезеңде Қазақстан үшін қажеттілігі бар екенін атап өтті.
«Жұрттың бәрі Вице-Президент лауазымы туралы сұрап жатыр. Расында, бұл – айтулы өзгеріс. Біз Конституциямызға жаңа лауазымды әдейі енгіздік. Бұл лауазым аса қажет деп айтсақ, қателеспейміз. Себебі қазіргі бұлыңғыр заманда мұндай лауазым елімізге өте қажет», – деді Қасым-Жомарт Тоқаев.
Мемлекет басшысы Вице-президенттің кім болатынын қазір нақты атай алмайтынын, алайда бұл мәселе жақын арада белгілі болатынын жеткізді.
«Келесі аптада немесе он күн ішінде Вице-Президент кім екені мәлім болады. Мен оны қазір анық айта алмаймын. Ол белгілі, сіздер жақсы білетін адам болады деп ойлаймын», – деді Президент.
Осылайша, Қазақстандағы жаңа жоғары мемлекеттік лауазымға тағайындалатын тұлғаның есімі алдағы он күн ішінде белгілі болуы мүмкін.
Вице-президент институтының енгізілуі елдегі саяси реформалардың жаңа кезеңімен байланысты. Жаңа лауазымның нақты өкілеттіктері мен мемлекеттік басқару жүйесіндегі рөлі де алдағы уақытта айқындала түседі.
