КЕЛЕШЕК МЕКТЕПТЕРІ БІЛІМ БЕРУДІҢ ОЗЫҚ ТӘЖІРИБЕЛЕРІ СЫНАЛАТЫН ОРТАЛЫҚ БОЛУҒА ТИІС
Мемлекет басшысы Қасым-Жомарт Тоқаев Қазақстандағы орта білім беру жүйесін жаңғырту және оның тиімділігін арттыру мәселесіне ерекше назар аударды. Президент алдағы үш жыл ішінде «Келешек мектептері» жобасы аясында салынған білім ошақтары заманауи педагогикалық тәсілдер мен озық білім беру тәжірибелерін сынақтан өткізетін орталықтарға айналуы керектігін айтты.
Президенттің пікірінше, білім беру сапасын арттыру үшін барлық өңірдің мүмкіндігі бірдей болуы маңызды. Осыған байланысты оқу көрсеткіштері төмен облыстарға нақты қолдау көрсету қажеттігі айтылды.
Мемлекет басшысы бұл бағытта Президент Әкімшілігіне Үкіметпен бірлесіп, білім беру саласында төмен нәтиже көрсетіп отырған өңірлерге арнайы талдау жүргізіп, тиісті көмек көрсету жөнінде тапсырма берді.
«Бұдан бөлек, Президент Әкімшілігіне Үкіметпен бірлесіп, төмен нәтиже көрсеткен облыстарға нақты көмек көрсетуді, мысалы, арнайы талдау жүргізуді тапсырамын», – деді Қасым-Жомарт Тоқаев.
Сонымен қатар Үкіметке білім беру жүйесінің тиімділігін арттыруға бағытталған, жан-жақты зерттелген шешімдер әзірлеу міндеті қойылды. Президент бұл ретте жақсы нәтиже көрсетіп отырған мектептердің тәжірибесін кеңінен қолданудың маңызын атап өтті.
Оның айтуынша, білім беру саласындағы даму институттарының әлеуетін де тиімді пайдалану қажет. Мұндай тәжірибе өңірлер арасындағы білім сапасының алшақтығын азайтып, үздік тәсілдерді басқа мектептерге енгізуге мүмкіндік береді.
Мемлекет басшысы орта білім беру мазмұнын заман талабына сәйкес жаңғырту мәселесіне де тоқталды. Оның пікірінше, қазіргі мектеп бағдарламалары оқушыларды болашаққа, жаңа технологияларға және қоғамның дамуына бейімдеуге бағытталуы керек.
«Құзырлы министрлік орта білімнің мазмұнын заман талабына сай жаңғыртуы қажет. Мысалы, тарихи аңыздар мен шындыққа сай келмейтін оқиғалардың орнына өскелең ұрпаққа ілгерілеуге, прогреске бағытталған пәндерді оқыту қажет», – деді Президент.
Қасым-Жомарт Тоқаев осы бағыттағы оқу бағдарламаларын әзірлеу Білім министрлігінің жедел міндеттерінің бірі екенін атап өтті. Яғни білім мазмұны тек теориялық білім берумен шектелмей, оқушылардың заманауи дағдыларын қалыптастыруға, сыни ойлауын дамытуға және болашақтағы өзгерістерге дайын болуына бағытталуы тиіс.
Президент «Келешек мектептеріне» ерекше рөл жүктелетінін айтты. Бұл білім ошақтары тек жаңа ғимараттар мен заманауи инфрақұрылымның үлгісі болып қалмай, инновациялық шешімдерді тәжірибеден өткізетін және тиімді білім беру әдістерін қалыптастыратын алаңға айналуы қажет.
«Келешек мектептері» инновациялық шешімдерді енгізу және ұлттық білім беру үлгісін қалыптастыру ісінде маңызды рөл атқаруы керек», – деді Мемлекет басшысы.
Бұл ретте Ыбырай Алтынсарин атындағы Ұлттық білім академиясына да үлкен жауапкершілік жүктелмек. Академия жаңа білім беру тәсілдерін ғылыми тұрғыдан зерделеп, олардың тиімділігін бағалау және озық тәжірибелерді білім беру жүйесіне енгізу бағытында жұмыс істеуі тиіс.
Мемлекет басшысы алдағы үш жылды «Келешек мектептері» жобасының мүмкіндіктерін тиімді пайдаланатын кезең ретінде қарастыру қажеттігін айтты.
«Алдағы үш жыл ішінде «Келешек мектептері» білім берудің озық тәжірибелерін сынақтан өткізетін орталыққа айналуға тиіс», – деді Қасым-Жомарт Тоқаев.
Президенттің айтуынша, білім беру жүйесін жаңғырту бір ғана министрліктің міндеті емес. Бұл бағытта Үкімет, білім беру ұйымдары, даму институттары және өңірлер бірлесіп жұмыс істеуі қажет.
Жалпы, Мемлекет басшысы көтерген бастамалар Қазақстандағы мектеп білімін жаңа талаптарға бейімдеуге бағытталған. «Келешек мектептері» жобасы арқылы заманауи оқыту әдістерін енгізу, үздік мектептердің тәжірибесін тарату және білім сапасы төмен өңірлерге жүйелі қолдау көрсету көзделіп отыр.
