ТОҚАЕВ БІЛІМ БЕРУДЕГІ ЖАҢА ТЕХНОЛОГИЯЛАРМЕН ТАНЫСТЫ

Көрме білім беру саласындағы жаңа тәсілдер мен инновациялық технологияларды таныстыруға арналған. Іс-шара барысында Президентке мұғалімдердің жұмысын жеңілдетуге, оқу процесін жетілдіруге және оқушылардың білім алу мүмкіндігін кеңейтуге бағытталған бірқатар жоба көрсетілді.

Атап айтқанда, Мемлекет басшысына «Талдау орталығының» қызметі және жасанды интеллект технологияларын қолданатын талдау құралдары таныстырылды. Бұл шешімдер білім беру үдерісіндегі деректерді тиімді пайдалануға, оқу нәтижелерін саралауға және педагогтерге қажетті ақпаратты жедел алуға мүмкіндік береді.

Көрмеде Қасым-Жомарт Тоқаевқа мұғалімдердің сабаққа дайындалуына көмектесетін WONK педагогтің AI-ассистенті таныстырылды. Жасанды интеллект негізіндегі бұл құрал педагогтің уақытын үнемдеп, сабақ жоспарын әзірлеу және оқу материалдарын дайындау барысында қолдау көрсетуге бағытталған.

Бұдан кейін Президентке цифрлық технологиялар қолданылатын 3-сыныптағы математика сабағының үзіндісі көрсетілді. Сабақ барысында Qalam AI, Beyim AI, TopIQ және E-OQULYQ цифрлық шешімдерінің мүмкіндіктері таныстырылды.

Бұл платформалар оқу материалдарын цифрлық форматта ұсынуға, оқушылардың білім деңгейін бақылауға және сабақ барысын заманауи технологиялар арқылы ұйымдастыруға мүмкіндік береді.

Көрме барысында білім берудің тек цифрландыру бағытындағы жобалары ғана емес, оқушылардың шығармашылық және зияткерлік қабілеттерін дамытуға арналған бастамалар да таныстырылды.

Мемлекет басшысы заманауи балалар басылымдарын қарап шықты. Олардың қатарында әлем әдебиетінің үздік шығармаларының қазақ тіліне аударылған нұсқалары да бар. Бұл жобалар жас оқырмандардың кітапқа қызығушылығын арттыруға және сапалы әдебиетті ана тілінде оқуға мүмкіндік беруге бағытталған.

Сонымен қатар Президент ғылым, инженерия, робот техникасы және инновация салаларында жетістікке жеткен оқушылардың жұмыстарымен танысты.

Жас өнертапқыштардың жобалары мен техникалық бағыттағы жетістіктері білім беру жүйесінде оқушылардың тек теориялық біліммен шектелмей, практикалық дағдыларды меңгеруіне басымдық беріліп келе жатқанын көрсетті.

«Білім болашағы» көрмесінде ұсынылған жобалар білім беру саласының технологиялық тұрғыдан жаңарып келе жатқанын аңғартты. Жасанды интеллект, цифрлық платформалар, заманауи оқу құралдары мен инженерлік жобалар мұғалім мен оқушының мүмкіндігін кеңейтуге бағытталған.

Республикалық тамыз конференциясы аясындағы бұл көрме білім беру саласындағы жаңа бастамаларды талқылап қана қоймай, оларды іс жүзінде таныстыруға мүмкіндік берді. Көрмеде ұсынылған шешімдер мұғалімнің жұмысын жеңілдету, оқу сапасын арттыру және оқушылардың заманауи білімге қолжетімділігін кеңейту бағытындағы жұмыстардың маңызды бөлігі болып отыр.

Мемлекет басшысының көрмемен танысуы білім беру жүйесін жаңғыртуда цифрлық технологиялар мен жасанды интеллектінің әлеуетін тиімді пайдалануға басымдық беріліп отырғанын көрсетті. Ал оқушылардың ғылым, робот техникасы мен инженерия саласындағы жетістіктері елімізде жаңа буын мамандарын даярлауға қажетті негіз қалыптасып келе жатқанын аңғартады.