МАҢҒЫСТАУДА ҚАЗА ТАПҚАН ӘСКЕРИ ҚЫЗМЕТШІЛЕР МЕМЛЕКЕТТІК НАГРАДАЛАРМЕН МАРАПАТТАЛДЫ
Мемлекет басшысының Жарлығымен Маңғыстау облысында оқу-жаттығу жиыны кезінде әскери борышын атқару үстінде қаза тапқан әскери қызметшілер Қазақстан Республикасының мемлекеттік наградаларымен марапатталды.
Әскери қызметшілерге мемлекеттік наградалар әскери борышын өтеу кезінде көрсеткен ерлігі мен жанқиярлығы үшін берілді.
Атап айтқанда, 29011 әскери бөлімі взводының командирі Олжас Мұхтарұлы Бауыржан Момышұлы атындағы ІІ дәрежелі «Айбын» орденімен марапатталды.
Ал Рахымжан Қошқарбаев атындағы ІІІ дәрежелі «Айбын» орденіне 29011 әскери бөлімінде қызмет атқарған 14 әскери қызметші лайық деп танылды.
Олардың қатарында бөлімше командирлері Сержан Талғатұлы Аяпберген, Мейрамбек Ермұханұлы Бердіханов, Мансұр Айтбайұлы Ғұмаров, Олжас Тәжібайұлы Диханбаев, сондай-ақ Дастан Нұрболұлы Бегей, Ақжайық Болатбекұлы Гилаж, Әсет Саматұлы Жаңабай, Алмас Жүсіпұлы Көбенов, Азамат Болатбекұлы Мәдіхан, Өмірбек Өмірболатұлы Өмірзақ, Жеңіс Тілеуішұлы Темірғалиев, Ақылбек Қабденұлы Төлеген және Мирас Тұрдыбекұлы бар.
Марапатталған әскери қызметшілердің арасында аға матростар, матростар және әскери бөлім мамандары да бар. Олар түрлі әскери міндеттерді атқарған, оның ішінде аға атқыш, граната атқыш, көздеуші, граната атқыштың көмекшісі, оқшашар атқыштың көмекшісі және атқыш қызметтерін атқарған.
Мемлекеттік наградалардың берілуі – әскери борышын өтеу кезінде қаза тапқан қызметшілердің ерлігіне көрсетілген мемлекеттік құрметтің белгісі.
Оқу-жаттығу жиыны барысында болған қайғылы оқиға салдарынан қаза тапқан әскери қызметшілердің ерлігі ел жадында сақталады. Олардың отбасылары мен жақындарына қайғырып көңіл айтамыз.
