1 МАУСЫМ – БАЛАЛАРДЫ ҚОРҒАУ КҮНІ: БАЛАЛАР БАҚЫТЫ – ЕЛ БОЛАШАҒЫ

Бұл күн балалардың құқықтарын қорғау, олардың денсаулығы мен қауіпсіздігін қамтамасыз ету, өмір сүру сапасын арттыру сынды маңызды мәселелерге қоғам назарын аударуға бағытталған. Қазақстанда да бұл мерекенің алар орны ерекше. Себебі бала – ұлттың болашағы, ел ертеңі. Халық даналығында айтылғандай, “Баланы жастан, ұлтты бастан” тәрбиелеу – әрбір елдің өркендеуінің кепілі.

Қазақстанда балалардың жан-жақты дамуына, қауіпсіз ортада өмір сүруіне, білім мен денсаулыққа қол жеткізуіне айрықша мән беріледі. Ел Президенті Қасым-Жомарт Тоқаевтың бастамасымен жүзеге асырылып жатқан “Балалар жылы”, “Ұлттық қор – балаларға” және “Балаға лайық” сияқты бастамалар еліміздің өсіп келе жатқан жас буынына деген қамқорлықтың айқын көрінісі.

Мемлекеттік деңгейде қабылданған “Балалар құқықтары туралы” Заң, мектепке дейінгі және жалпы орта білім беруді дамыту бағдарламалары, әлеуметтік қорғау тетіктері – барлығы да бала игілігі үшін жасалып отыр. Сонымен қатар, ерекше қажеттілігі бар балаларға қолжетімді орта қалыптастыру, инклюзивті білім беру мен оңалту жүйесін дамыту – елдегі бала құқығы мен қорғалуына деген қамқорлықтың бір бөлшегі.

1 маусым күні еліміздің барлық өңірлерінде балаларға арналған түрлі мерекелік шаралар өткізіледі. Балалар саябақтарында, мектептерде, мәдениет үйлерінде концерттік бағдарламалар, спорттық жарыстар, шығармашылық байқаулар ұйымдастырылады. Бұл – балаларға шаттық сыйлайтын, олардың ерекше бір күн ретінде есте сақтап қалатын шуақты мерекесі.

Сонымен қатар, бұл күн ата-аналар мен педагогтарға да балаларға көбірек көңіл бөлу, олардың ой-арманы мен пікіріне құлақ түру, олардың жан-дүниесін түсіну қажеттігін еске салады. Баланың еркін дамуына жағдай жасау – тек мемлекеттің емес, бүкіл қоғамның міндеті. Өйткені әрбір бала – өзінше ерекше әлем.

Мемлекет тарапынан балалардың сапалы білім мен медициналық қызмет алуына, спортпен айналысуына, шығармашылық қабілеттерін дамытуына барлық мүмкіндік жасалуда. Елдегі әрбір үшінші тұрғын – балалар мен жасөспірімдер. Демек, ел болашағы тікелей осы буынның қандай тәлім-тәрбие алатынына, қандай құндылықтарды бойына сіңіретініне байланысты.

2024 жылдан бастап “Ұлттық қор – балаларға” бағдарламасы аясында әрбір қазақстандық балаға ұлттық қордан арнайы жинақтар есептелуде. Бұл – олардың болашақтағы білім алуына, тұрғын үй немесе басқа қажеттіліктеріне жұмсалатын маңызды қаржылық қолдау болмақ.

Сондай-ақ, республика бойынша мыңдаған балалар тегін жазғы лагерьлерге, сауықтыру орталықтарына жіберіліп, олардың демалысын тиімді әрі қауіпсіз өткізуге жағдай жасалады.

ТӨЛЕ БИ АУДАНЫНДАҒЫ 1 МАУСЫМ МЕРЕКЕСІ

Төле би ауданы 1 маусым – Балаларды қорғау күнін ерекше дайындықпен, мерекелік көңіл-күймен қарсы алады. Аудан орталығы мен ауылдық округтерде балаларға арналған түрлі мерекелік іс-шаралар ұйымдастырылып, олардың көңілін көтеруге, шығармашылық қабілеттерін ашуға мүмкіндік беріледі.

2025 жылы Төле би ауданында бұл мейрамға орай “Балалар – бақытымыз!” атты ауқымды фестиваль өткізілді. Мектеп оқушылары мен балабақша тәрбиеленушілері арасында ән, би, сурет, қолөнер бойынша байқаулар ұйымдастырылып, үздік қатысушылар марапатталды. Сонымен қатар, аудандық мәдениет үйінің алаңында балаларға арналған аттракциондар, аниматорлар мен театрландырылған көріністер қойылып, балалар мен ата-аналарға нағыз мерекелік атмосфера сыйлады.

Аудан әкімдігі мен кәсіпкерлердің қолдауымен көпбалалы және әлеуметтік жағдайы төмен отбасылардан шыққан 200-ге жуық балаға мектепке қажетті құрал-жабдықтар мен тәтті сыйлықтар тарту етілді. Ал аудандық ауруханада ем алып жатқан балалар үшін арнайы концерттік бағдарлама ұйымдастырылып, қуанышқа бөленген бүлдіршіндердің жүзінен шынайы шаттық байқалды.

Балалар – еліміздің ертеңі. Олар қандай ортада өссе, ертең сондай қоғам құрары анық. Сондықтан оларға мейірім мен махаббатты, бақыт пен тыныштықты бүгіннен бастап сыйлау – бәріміздің ортақ міндетіміз. 1 маусым – тек мереке ғана емес, балаларға деген қамқорлықты тереңнен сезінетін, олардың болашағына жауапкершілікпен қарауға үндеу тастайтын күн.

Осы орайда Төле би ауданының барлық бүлдіршіндеріне шат күлкі, қуанышты балалық шақ, бақытты болашақ тілейміз! Бала күлкісі – баршаға ортақ қуаныш!