АТЫРАУДАҒЫ ЖОҒАЛҒАН ОТБАСЫ ІСІ: ІЗДЕУДЕ БОЛҒАН МЕЙРАМГҮЛ МЕН НАУРЫЗДЫҢ ДЕНЕСІ ТАБЫЛДЫ
Атырау облысында қоғам назарын аударған жоғалған отбасы ісінде жаңа әрі қайғылы дерек белгілі болды. Ұзақ уақыт бойы іздеуде болған ағасы Наурыз Мұқанғалиев пен қарындасы Мейрамгүл Қарабалинадың мәйіттері табылды.
Тергеу мәліметінше, күдікті Сұлтан Сәрсемәлиев тергеу барысында олардың қайда көмілгенін айтып, қылмысын мойындаған.
Оның айтуынан кейін Атыраудағы тергеушілер көрсетілген мекенжайды қайта тексеріп, Геолог шағын ауданындағы үй ауласынан екі адамның мәйітін тапты. Белгілі болғандай, бұл үйде күдікті Сұлтан Сәрсемәлиев әйелі Ақбаянмен бірге тұрған.
Бір отбасының жұмбақ жоғалуы
Бұл оқиға 2025 жылдың күзінде Атырау облысы Қызылқоға ауданы Жангелдин ауылында басталған. Сол кезде бір отбасының төрт мүшесі бірдей із-түссіз жоғалып кеткені туралы хабар тараған. Жергілікті тұрғындар мен туыстары олардың байланысқа шықпай қалғанын айтып, құқық қорғау органдарына жүгінген.
Оқиға қоғамда үлкен алаңдаушылық тудырып, іздестіру жұмыстары басталды. Полиция қызметкерлері мен еріктілер бірнеше бағытта іздеу жүргізді.
Алдымен ата-ананың мәйіттері табылған
Іздеу жұмыстары барысында ең алғашқы ауыр дерек белгілі болды. Тергеу кезінде ерлі-зайыптылар Мақсот Қарабалин мен Насипа Өтешқалиеваның мәйіттері өз үйлерінің ауласынан табылды.
Бұл жағдайдан кейін қылмыстық іс қозғалып, тергеу амалдары күшейтілді. Ал олардың балалары Мейрамгүл мен Наурыз сол уақыттан бері іздеуде болған.
Күдікті ретінде күйеу бала қарастырылды
Тергеу барысында отбасының күйеу баласы Сұлтан Сәрсемәлиев негізгі күдікті ретінде аталды. Кейін ол құқық қорғау органдарынан жасырынып, шетелге кеткені белгілі болды. Біраз уақыттан соң күдікті шетелде ұсталып, Қазақстанға жеткізілді.
Тергеу кезінде ол Наурыз бен Мейрамгүлді өлтіргенін айтып, олардың денесін бұрын өзі тұрған үй ауласына көмгенін көрсеткен. Осы мәліметтің негізінде мәйіттер табылды.
Күдіктінің әйелі психиатриялық ауруханаға жатқызылған
Қазіргі уақытта бұл іс бойынша тергеу жалғасып жатыр. Негізгі күдікті ретінде Сұлтан Сәрсемәлиев қарастырылып отыр. Ал оның әйелі Ақбаян психиатриялық ауруханаға жатқызылғаны белгілі болды.
Осылайша, бірнеше ай бойы жұмбақ күйде қалған жоғалған отбасы ісі төрт адамның қазасымен аяқталып отыр. Тергеу органдары қылмыстың барлық мән-жайын анықтауды жалғастыруда.
