САУРАН АУДАНЫНДА ЖАСӨСПІРІМДЕРГЕ ЖЫНЫСТЫҚ ЖОЛМЕН БЕРІЛЕТІН ИНФЕКЦИЯЛАРДЫҢ АЛДЫН АЛУ ТҮСІНДІРІЛДІ
Сауран ауданында жасөспірімдердің денсаулығын сақтау және олардың медициналық сауаттылығын арттыру бағытындағы түсіндіру жұмыстары жалғасуда.
Осы мақсатта Сауран аудандық білім бөліміне қарасты Ж.Тәшенев атындағы жалпы білім беретін мектебінде арнайы семинар сабақ ұйымдастырылды. Іс-шараға Сауран аудандық емханасының акушері Парманкулова Б. мен психолог Жусупалиева М. қатысып, жоғары сынып оқушыларына жыныстық жолмен берілетін инфекциялардың алдын алу тақырыбында кең көлемде ақпарат берді. Семинар барысында мамандар жастар арасында денсаулыққа жауапкершілікпен қарау мәдениетін қалыптастырудың маңыздылығына ерекше тоқталды.
Кездесу барысында оқушыларға жыныстық жолмен берілетін инфекциялардың адам ағзасына тигізетін зияны мен оның таралу жолдары түсіндірілді. Мамандардың айтуынша, ЖЖБИ – адамнан адамға көбіне жыныстық қатынас арқылы берілетін инфекциялар тобына жатады. Сонымен қатар кейбір инфекциялар жүктілік және босану кезінде анадан балаға, сондай-ақ жұқтырылған қан арқылы да берілуі мүмкін. Семинарда мұндай аурулардың бастапқы кезеңде байқалмай дамып, уақыт өте келе ауыр асқынуларға алып келуі мүмкін екені айтылды. Әсіресе дер кезінде емделмеген инфекциялар адамның репродуктивті денсаулығына айтарлықтай қауіп төндіреді.
Мамандар семинар барысында жыныстық жолмен берілетін инфекциялардың салдары өте ауыр болуы мүмкін екенін ерекше атап өтті. Атап айтқанда, мұндай инфекциялар жүйке жүйесі мен жүрек-қан тамырлары ауруларына, бедеулікке, жатырдан тыс жүктілікке, өлі туылуға және адамның иммун тапшылығы вирусын жұқтыру қаупінің артуына себеп болуы мүмкін. Сондықтан оқушыларға өз денсаулығына немқұрайлы қарамаудың маңызы кеңінен түсіндірілді. Сонымен қатар мамандар денсаулыққа қатысты ақпараттарды тек сенімді медициналық көздерден алу қажеттігін де еске салды.
Семинарда ЖЖБИ-дің алдын алу жолдары туралы да жан-жақты айтылды. Мамандардың сөзінше, инфекциялардың алдын алудың ең тиімді жолдарының бірі – жауапкершілік пен сақтық мәдениетін қалыптастыру. Оқушыларға жұқтырмаған сенімді серіктестің болуы, жыныстық қатынас кезінде жеке қорғаныс құралдарын, соның ішінде презервативтерді қолданудың маңызы түсіндірілді. Сонымен қатар жастардың жыныстық жолмен берілетін инфекциялар туралы білім деңгейін арттыру, қауіптің алдын алу жолдарын білу және медициналық кеңестерге құлақ асу қажеттігі айтылды. Семинар барысында оқушылар өздерін қызықтырған сұрақтарын қойып, мамандардан нақты жауаптар алды.
Психолог маман жастар арасында психологиялық тұрақтылық пен дұрыс шешім қабылдай білудің маңыздылығына тоқталды. Жасөспірім кезеңінде түрлі орта әсері мен ақпараттардың көптігі кей жастардың қателікке бой алдыруына себеп болуы мүмкін екені айтылды. Осыған байланысты оқушыларға өзін-өзі құрметтеу, жеке қауіпсіздік және болашаққа жауапкершілікпен қарау мәселелері түсіндірілді. Психолог жастарға қысымға ермеу, денсаулыққа зиян келтіретін әрекеттерден аулақ болу және кез келген мәселеде ересектер мен мамандардың көмегіне жүгінуден қорықпау қажеттігін жеткізді.
Кездесу барысында мамандар ЖЖБИ белгілері туралы да кеңінен түсіндірді. Атап айтқанда, сыртқы жыныс мүшелерінің қызаруы, ауырсыну сезімі, қышу, ісіну, жаралардың пайда болуы, зәр шығару кезінде ауырсыну мен күйдіру сезімі, дене қызуының көтерілуі секілді белгілер инфекцияның негізгі белгілері болуы мүмкін екені айтылды. Сонымен қатар жағымсыз иісті бөлінділер мен жыныстық қатынас кезіндегі жайсыздық та назардан тыс қалдырмауы қажет симптомдардың қатарына жататыны түсіндірілді. Мамандар мұндай белгілер байқалған жағдайда өзін-өзі емдеуге болмайтынын қатаң ескертті.
Семинар соңында оқушыларға ауру белгілері байқалған жағдайда уақыт жоғалтпай, міндетті түрде дәрігерге қаралу қажеттігі түсіндірілді. Мамандар дерматовенеролог, гинеколог немесе уролог мамандары ғана нақты диагноз қойып, дұрыс ем тағайындай алатынын айтты. Ерте анықталған ауруды емдеу әлдеқайда тиімді болатыны, ал уақыт өткізіп алған жағдайда инфекция созылмалы түрге ауысуы мүмкін екені ескертілді. Мұндай түсіндіру жұмыстары жастардың медициналық сауаттылығын арттырып қана қоймай, олардың болашақ денсаулығын сақтауға бағытталған маңызды қадамдардың бірі болып саналады.
