ТӨЛЕБИДЕГІ ТӨРГЕ ЛАЙЫҚ БІЛІМ ОШАҒЫ: «КЕЛЕШЕК МЕКТЕПТЕРІ» ЖОБАСЫНЫҢ ЖЕМІСІ

Түркістан облысы, Төлеби ауданына қарасты Қосағаш елді мекенінде заманауи стандарттарға сай бой көтерген 300 орындық жаңа мектеп осыдан бірнеше ай бұрын салтанатты түрде пайдалануға берілген болатын. Мемлекет басшысы Қасым-Жомарт Тоқаевтың тікелей бастамасымен қолға алынған «Келешек мектептері» ұлттық жобасы аясында салынған бұл нысан – өңірдегі білім инфрақұрылымын сапалық тұрғыдан жаңа деңгейге көтерудің жарқын үлгісі. Заманауи білім кешенінің іске қосылуы жергілікті тұрғындар мен ұстаздар қауымы үшін стратегиялық маңызы бар, үлкен қуанышқа толы оқиғаға айналды.

Зәулім ғимараттың тұсаукесер рәсіміне Төлеби ауданының әкімі Еркеғали Әлімқұлов пен аудандық мәслихаттың төрағасы Нұрлан Қойбағаров арнайы қатысып, жұртшылықты жаңа білім ошағының ашылуымен құттықтаған еді. Аудан басшылығы өз сөзінде мемлекет тарапынан адам капиталын дамытуға, әсіресе ауыл балаларының бәсекеге қабілетті білім алуына барынша жағдай жасалып жатқанын атап өтті. Сондай-ақ бұл мектеп болашақта ел үмітін ақтайтын дарынды шәкірттер тәрбиелейтін қасиетті алтын ұяға айналатынына сенім білдірді.

Инновациялық үлгідегі бұл білім ошағы – жай ғана жаңа ғимарат емес, бұл оқу үдерісін цифрландыру мен жаңа технологияларды ықпалдастырудың озық алаңы. Мектептің ішкі құрылымы кең, жарық және эргономикалық талаптарға сай жоспарланған. Әрбір оқу бөлмесі интерактивті тақталармен жабдықталып, пәндік және ғылыми-зертханалық кабинеттер ең соңғы үлгідегі техникалық құралдармен қамтамасыз етілген. Әсіресе заманауи үрдістерге сай ашылған робототехника және IT сыныптары, компьютерлік кабинеттер ауыл балаларының цифрлық сауаттылығын ерте жастан арттыруға кең жол ашады. Мұнымен қоса, шығармашылық бағыттағы үйірме бөлмелері, бай кітап қоры жинақталған жайлы кітапхана мен кең оқу залдары шәкірттердің интеллектуалды тұрғыдан толысуына қызмет етуде.

Ұлттық жобаның басты талаптарының бірі – оқушылардың қауіпсіздігі мен инклюзивті орта қалыптастыру. Қосағаш ауылындағы мектеп ғимараты толықтай бейнебақылау камераларымен және өртке қарсы автоматтандырылған заманауи жүйелермен жабдықталған. Ерекше қажеттіліктері бар балалардың кедергісіз қозғалысы үшін халықаралық стандарттарға сай пандустар мен арнайы санитарлық тораптар қарастырылған. Сонымен қатар балалардың денсаулығы мен салауатты өмір салтын ұстануы үшін кең спорт залы, даладағы ашық спорт алаңдары және заманауи талаптарға сай жабдықталған асхана оқушылар игілігіне берілді. Жалпы жер аумағы 1,97 гектарды құрайтын бұл ірі нысанның құрылыс жұмыстары белгіленген мерзімде сапалы аяқталды.

Бұл білім ошағының тарихындағы ең ерекше және маңызды парақ – аоның алғашқы түлектеріне тікелей байланысты. Осыдан бірнеше ай бұрын, яғни қаңтар айында жаңа мектептің табалдырығын алғаш аттаған жоғары сынып оқушылары үшін бұл оқу жылы ұмытылмас сәттерге толы болды. Олар су жаңа сыныптарда, заманауи парталарда отырып білім алды, озық технологиялардың игілігін сезінді. Енді, міне, дәл осы қаңтарда басталған жаңа дәуірдің куәгерлері – мектептің алғашқы қарлығаштары оқу жылын осы заманауи білім ордасында сәтті тәмамдап, үлкен өмірге нық қадам басты. Бұл тарихи сәт мектеп жылнамасында алтын әріптермен жазылып қалды.

Президент тапсырмасына сәйкес, Төлеби ауданында білім беру инфрақұрылымын жаңғырту жұмыстары мұнымен шектелмейді. «Келешек мектептері» ұлттық жобасы аясында ауданда мектеп орындарының тапшылығын жою бағытында кешенді жұмыстар атқарылуда. Осы жүйелі қадамдардың нәтижесінде Көксәйек елді мекенінде 600 орындық, ал Киелітас елді мекенінде 900 орындық су жаңа мектеп ғимараттары бой көтеріп, ел игілігіне берілді. Ауыл мен қала мектептері арасындағы алшақтықты жоюға бағытталған бұл ауқымды жобалар Төлеби өңірінің, соның ішінде Қосағаш ауылының өркендеуіне және өскелең ұрпақтың жарқын болашағына салынған ең үлкен мемлекеттік инвестиция болып табылады.