«КҮТПЕГЕН БАЛА БОЛСАМ, НЕ БОЛЫПТЫ?» — ТҰРСЕН АЛАГӨЗОВТІҢ ҰЛЫ ЕЛ ТАЛҚЫЛАҒАН СӨЗГЕ ЖАУАП БЕРДІ
Белгілі кәсіпкер Тұрсен Алагөзовтің ұлы Арсен Алагөзов әкесінің өзі туралы айтқан «күтпеген бала» деген сөзіне алғаш рет ашық пікір білдірді. Ол бұл тақырыпқа қатысты ішінде өкпе де, реніш те жоқ екенін айтты.
Арсен Алагөзов тележүргізуші Динара Сәтжанға берген сұхбатында әкесімен сегіз жыл араласпағанын растады. Соған қарамастан, өткен өміріне өкінішпен қарамайтынын жеткізді.
«Бәрін өмірлік тәжірибе ретінде қабылдаймын. Кейде «бәрі басқаша болуы мүмкін еді» деп ойлайсың. Бірақ өткенді өзгерте алмайсың. Біз бұл жолдан өттік», – деді ол.
Арсеннің айтуынша, бүгінде әкесіне қоятын ешқандай сұрағы қалмаған. Ол Тұрсен Алагөзовті өзіндік мінезі бар, бірақ көп адамға көмектескен табысты кәсіпкер ретінде сипаттады.
Сондай-ақ ол бала кезінде әке мейірімі мен назары жетіспеген болуы мүмкін екенін жасырмады. Алайда өзін тағдырдың құрбаны ретінде көрсеткісі келмейтінін айтты.
Ең көп талқыланған мәселе — Тұрсен Алагөзовтің бұрынғы сұхбаттарының бірінде ұлын алғаш рет екі жасында көргенін айтып, «күтпеген бала» деген сарында пікір білдіруі болды. Арсен бұл сөздің өзіне емес, оның бүкіл ел алдында айтылғанына қынжылғанын жеткізді.
«Мен бір нәрсеге сенімдімін: мен үлкен махаббатпен дүниеге келдім. Әкем оны жай ғана есінде сақтамаған шығар. Маған ауыр тигені — осы әңгіменің көпшілік алдында айтылғаны», – деді Арсен.
Сонымен қатар ол елдің өзін аяғанын қаламайтынын ашық айтты.
«Адамдар мені аяй бастағанын байқадым. Ал мені біреу аяса, өзімді жайсыз сезінемін. «Күтпеген бала» болсам, не болыпты? Мен махаббатпен дүниеге келдім. Алла маған бәрін берді. Өзімді мықты әрі сенімді адам ретінде сезінемін», – деді ол.
Арсен Алагөзов әкесінің «егер ұлым зауытты басқара алмаса, қызметтен аламын» деген сөзіне де түсіністікпен қарайтынын айтты. Оның пікірінше, бизнесте туыстық емес, нәтиже маңызды.
