ҚОСТАНАЙДА 1,5 КЕЛІДЕН АСТАМ ЕСІРТКІ ТАСЫМАЛДАҒАН КУРЬЕР ҰСТАЛДЫ
Қостанай қаласында өңіраралық бағытта есірткі тасымалдаған интернет-дүкен курьері ұсталды. Бұл туралы Ішкі істер министрлігі хабарлады.
Полиция мәліметінше, жедел-іздестіру іс-шаралары барысында 25 жастағы ер адам анықталған. Ол ел өңірлері арасында ірі көлемдегі есірткі партияларын тасымалдап, кейін оларды жасырын орындарға жеткізіп отырған.
Күдікті қылмыстық әрекетін жасыру үшін есірткі заттарын вакуумдық қаптамаға салып, құрғақ сүт қаптамаларының ішіне жасырған. Бұл тәсіл тасымалдау кезінде күдік туғызбауға бағытталған.
Ұстау кезінде полиция заңсыз айналымнан жалпы салмағы 1,5 келіден асатын есірткі заттарын тәркіледі. Оның ішінде меткатинон психотроптық заты мен кептірілген марихуана болған. Сараптама қорытындысына сәйкес, тәркіленген заттар 10 мыңнан астам бір реттік дозаға тең.
Қазіргі уақытта полиция интернет-есірткі дүкенін ұйымдастырушыларды, жеткізу арналары мен қылмыстық схемаға қатысы бар өзге де тұлғаларды анықтап жатыр.
ІІМ интернет арқылы есірткі бизнесіне қатысудың кез келген түрі заң алдында ауыр жауапкершілікке әкелетінін ескертті. Мұндай қылмыстар үшін заңнамада ұзақ мерзімді, тіпті өмір бойына бас бостандығынан айыру жазасы қарастырылған.
