АҚ ҮЙ TRUMP TV ОНЛАЙН-АРНАСЫН ІСКЕ ҚОСТЫ

Trump TV: The Essentials Station деп аталатын арна 21 қыркүйекте Ақ үйдің ресми цифрлық платформалары мен YouTube арнасында іске қосылды. Жоба тәулік бойы жұмыс істеп, Дональд Трамптың сөйлеген сөздерін, әкімшілік мәлімдемелерін, президент қатысқан іс-шаралардан түсірілген материалдарды, сондай-ақ бұған дейінгі архивтік кадрларды ұсынады. Ақ үй арнаны әкімшілік қызметі туралы ақпаратты тікелей таратуға арналған платформа ретінде таныстырды.

Trump TV-дің іске қосылуы АҚШ президенті мен бірқатар жетекші ақпарат құралдарының арасындағы даудың жаңа кезеңіне тұспа-тұс келді. 18 қыркүйекте Дональд Трамп CNN, MS NOW және Politico журналистеріне Ақ үй аумағына кіруге берілген рұқсаттарды алып тастайтынын жариялаған. Президент бұл шешімін аталған медиалардың өзі туралы «жалған ақпарат» таратты деген уәжімен түсіндірді.

Кейін үш медиа ұйым бұл шешімге байланысты федералдық сотқа жүгінді. CNN, MS NOW және Politico Ақ үйдің әрекеті журналистердің ақпарат тарату құқығына қатысты конституциялық кепілдіктерге қайшы келеді деп санайды. Ақ үй болса, журналистердің жаңалық жариялау құқығы сақталатынын, алайда арнайы баспасөз аккредитациясы мен Ақ үйдегі журналистер пулына қатысу автоматты түрде берілмейтінін мәлімдеді.

Даудың салдары Ақ үйдегі президенттік түсірілім жүйесіне де әсер етті. Бұған дейін ABC, CBS, CNN, Fox News және NBC президенттің сапарлары мен қоғамдық іс-шараларын кезекпен түсіріп, дайын бейнематериалдарды басқа телеарналарға ортақ пайдалануға беріп отырған. Бұл жүйе «телевизиялық пресс-пул» ретінде жұмыс істейді.

21 қыркүйекте CNN президенттің кезекті түсірілім кезегін атқаруы тиіс болған. Алайда арнаға Ақ үйге кіруге шектеу қойылғаннан кейін ABC, CBS, Fox News және NBC CNN-нің орнына түсірілім жүргізуден бас тартты. Нәтижесінде президенттің іс-шараларын түсіретін дәстүрлі телевизиялық пул уақытша тоқтатылды. Бес ірі телеарна бірлескен мәлімдемесінде қоғамның мемлекеттік билік туралы тәуелсіз әрі нақты ақпарат алуға құқығы бар екенін атап өтті.

Бұл жағдай Дональд Трамптың Біріккен Ұлттар Ұйымы Бас Ассамблеясына қатысуы қарсаңында орын алды. CNN президенттің Нью-Йоркке сапарын және БҰҰ Бас Ассамблеясы аясындағы іс-шараларды түсіретін кезекті телеарна болуы керек еді. Алайда басқа телеарналар CNN-нің орнын алмаудан бас тартқан соң, президенттік сапарды дәстүрлі телевизиялық пул арқылы түсіру тоқтатылды.

Оқиғаға баспасөз ұйымдары да реакция білдірді. The Washington Post Дональд Трамптың іс-шараларынан түсірілген фотосуреттерді уақытша жарияламау туралы шешім қабылдағанын хабарлады. Мұндай қадам CNN, MS NOW және Politico-ға көрсетілген шектеулерге қарсылық ретінде қабылданды.

Осылайша, Ақ үй мен америкалық бұқаралық ақпарат құралдары арасындағы келіспеушілік президенттің күнделікті қызметін жариялау тәртібіне тікелей әсер етіп отыр. Бір жағынан, әкімшілік өз мәлімдемелері мен іс-шараларын енді Trump TV арқылы тікелей тарату мүмкіндігіне ие болса, екінші жағынан, дәстүрлі медиа ұйымдар президентті тәуелсіз журналистік форматта жариялауға қатысты өз ұстанымдарын қорғап отыр.

Ақ үйдің жаңа арнасы әзірге дәстүрлі телеарналардың орнын толық алмастыра ма, жоқ па — оны алдағы уақыт көрсетеді. Ал Trump TV-дің іске қосылуы АҚШ-та президент әкімшілігі мен бұқаралық ақпарат құралдары арасындағы ақпарат таратуға қатысты даудың жаңа кезеңге өткенін көрсетті.