ҚАЗАҚСТАН ХАЛЫҚ КЕҢЕСІНІҢ ҚҰРАМЫ БЕКІТІЛДІ
Президенттің 2026 жылғы 22 қыркүйектегі жарлығымен Қазақстан халық кеңесінің құрамы бекітілді. Кеңес құрамына барлығы 126 адам енді.
Жарлық «Қазақстан халық кеңесі туралы» Конституциялық заңның 5-бабының 1) тармақшасына сәйкес қабылданған. Аталған заңға сәйкес, Қазақстан халық кеңесінің құрамын Мемлекет басшысы бекітеді.
Қазақстан халық кеңесі – Қазақстан халқының мүдделерін білдіретін жоғары конституциялық консультативтік орган. Оның негізгі міндеттерінің бірі – мемлекеттік саясатты қалыптастыру мен іске асыруға консультативтік тұрғыдан қатысу, сондай-ақ жалпыұлттық диалогты ұйымдастыру.
Конституциялық заңда белгіленген тәртіп бойынша Кеңес құрамына үш бағыттан 42 адамнан өкілдік енгізілген. Атап айтқанда, 42 адам этномәдени бірлестіктерден, тағы 42 адам қоғамдық бірлестіктер мен өзге де коммерциялық емес ұйымдардан, сондай-ақ 42 адам Астана, облыстар және республикалық маңызы бар қалалардың мәслихаттары мен қоғамдық кеңестерінен ұсынылған.
Жаңа құрамда қоғамның әртүрлі салаларының өкілдері бар. Олардың қатарында мәслихат депутаттары, қоғамдық кеңес мүшелері, этномәдени бірлестіктердің жетекшілері, қоғам қайраткерлері, ғалымдар, педагогтер, дәрігерлер, спортшылар, кәсіпкерлер, журналистер, мәдениет және шығармашылық саласының өкілдері бар.
Кеңес құрамына Түркістан облысынан да өкілдер енді. Атап айтқанда, Түркістан облысы Қоғамдық кеңесінің мүшесі Сырым Ертаев және Түркістан облысы мәслихатының депутаты Алмас Сәлімов Қазақстан халық кеңесінің мүшелері ретінде бекітілді.
Сонымен қатар жаңа құрамда қоғамның түрлі топтарының мүддесін білдіретін азаматтар бар. Мәселен, Қазақстанның Еңбек Ерлері, ғылым және білім саласының мамандары, этномәдени бірлестіктердің өкілдері, жастар ұйымдарының жетекшілері, кәсіпкерлер мен қоғамдық ұйымдардың белсенді мүшелері Кеңес құрамына кірді.
Кеңес құрамында Қазақстан Жазушылар одағының мүшелері, спорт федерацияларының басшылары, кәсіподақ өкілдері, адвокаттар, волонтерлік қозғалыс өкілдері және әлеуметтік мәселелермен айналысатын қоғамдық ұйымдардың жетекшілері де бар.
Президенттің жарлығы қол қойылған күнінен бастап күшіне енді. Қазақстан халық кеңесінің бекітілген жаңа құрамы алдағы уақытта елдегі жалпыұлттық диалог пен қоғамдық келісім мәселелеріне қатысты консультативтік қызмет атқарады.
