БАС ПРОКУРАТУРА ЖАРТЫЖЫЛДЫҚ ҚОРЫТЫНДЫСЫН ЖАРИЯЛАДЫ: ЗАҢ МЕН ТӘРТІП БАҒЫТЫНДАҒЫ ЖҰМЫС ЖАЛҒАСУДА
Бас прокуратурада 2026 жылдың бірінші жартыжылдығындағы жұмыс қорытындылары шығарылды.
Кеңейтілген алқа отырысы Бас Прокурор Берік Асыловтың төрағалығымен өтіп, оған прокуратура органдарының басшылығы мен жауапты қызметкерлер қатысты. Жиында осы алты айда атқарылған жұмыстар сараланып, алдағы кезеңдегі негізгі міндеттер айқындалды.
Отырыс барысында Бас Прокурор прокуратура қызметінің басты мақсаты – Мемлекет басшысы Қасым-Жомарт Тоқаев айқындаған Әділетті Қазақстанды құру бағытын жүйелі түрде жүзеге асыру екенін атап өтті. Оның айтуынша, заң үстемдігін қамтамасыз ету, қоғамдық қауіпсіздікті нығайту және азаматтардың конституциялық құқықтарын қорғау прокуратура жұмысының негізгі басымдықтарының бірі болып қала береді.
Берік Асылов қазіргі таңда елімізде жүзеге асып жатқан реформалардың маңызына тоқталып, жаңа Конституция адам құқықтарын қорғаудың тетіктерін күшейткенін айтты. Сондықтан прокуратура органдары заң талаптарының күнделікті өмірде нақты орындалуына ерекше мән беруге тиіс екенін жеткізді. Әрбір азаматтың құқығы заңмен қорғалып, Конституция талаптары іс жүзінде орындалғанда ғана қоғамда әділдік пен сенім қалыптасатынын атап өтті.
Жартыжылдық қорытындысы бойынша прокуратура қызметінің негізгі бағыттарында оң нәтижелер байқалған. Бұл құқық қорғау органдары арасындағы өзара үйлестірудің күшеюі, құқықбұзушылықтардың алдын алу шараларының тиімді жүргізілуі және цифрлық технологиялардың кеңінен енгізілуімен байланысты екені айтылды.
Соңғы жылдары елімізде «Заң және тәртіп» қағидатын нығайтуға ерекше көңіл бөлініп келеді. Сонымен қатар «Халық үніне құлақ асатын мемлекет» тұжырымдамасы аясында азаматтардың өтініштеріне жедел ден қою, олардың мәселелерін уақытылы шешу бағытындағы жұмыстар да жалғасуда. Бұдан бөлек, инвестициялық қауіпсіздікті қамтамасыз ету және мемлекеттік органдардың жұмысын цифрландыру бойынша да бірқатар маңызды қадам жасалған.
Статистикалық мәліметтерге сәйкес, биылғы бірінші жартыжылдықта елімізде тіркелген қылмыстық құқық бұзушылықтар саны өткен жылдың сәйкес кезеңімен салыстырғанда 10 пайызға төмендеген. Оның ішінде ауыр және аса ауыр қылмыстардың азайғаны байқалады. Сондай-ақ алаяқтық қылмыстарының саны 13 пайызға қысқарған. Бұл құқық қорғау органдарының алдын алу шараларының нәтижесімен қатар, халықтың құқықтық сауаттылығының артуымен де байланысты екені айтылды.
Қазіргі таңда прокуратура органдары интернет арқылы жасалатын қылмыстармен күреске де басымдық беріп отыр. Әсіресе есірткінің заңсыз айналымына қарсы жұмыстар күшейтілген. Бұл бағытта прокуратура құқық қорғау органдарымен және қаржы ұйымдарымен бірлесіп жұмыс жүргізуде.
Қабылданған шаралардың нәтижесінде 2025 жылдан бері заңсыз қаржы айналымына қатысы бар 530 мыңнан астам «дропперлік» шот бұғатталған. Сонымен қатар есірткі саудасынан түскен 2,6 миллиард теңге көлеміндегі заңсыз қаржының жолы кесіліп, интернетте есірткі жарнамалаған және таратқан 10 мың сайттың жұмысы тоқтатылған.
Мұндай нәтижелер цифрлық қылмыстармен күресте мемлекеттік органдардың өзара байланысы күшейіп келе жатқанын көрсетеді. Өйткені бүгінде көптеген құқық бұзушылық интернет арқылы жасалатындықтан, оларға қарсы заманауи тәсілдер қолдану аса маңызды.
Бұл жұмыстардың өңірлер үшін де маңызы зор. Соның ішінде Отырар ауданында да заңдылықты сақтау, құқықтық мәдениетті қалыптастыру және тұрғындардың құқықтық сауаттылығын арттыру бағытында жүйелі жұмыстар жүргізіліп келеді. Аудан прокуратурасы тұрғындармен тұрақты кездесулер өткізіп, азаматтардың өтініштерін тыңдап, құқықтық түсіндіру жұмыстарын ұйымдастыруда. Жуырда Темір ауылында өткен «Құқықтық дәріхана» жобасы да соның бір дәлелі болды. Мұндай бастамалар халық пен мемлекеттік органдар арасындағы байланысты нығайтып, тұрғындардың мәселесін заң аясында шешуге мүмкіндік береді.
Жалпы, жартыжылдық қорытындысы прокуратура органдарының тек құқық бұзушылықпен күресіп қана қоймай, оның алдын алуға, азаматтардың құқықтарын қорғауға және қоғамдағы заң мен тәртіп қағидатын нығайтуға басымдық беріп отырғанын көрсетті. Алдағы уақытта да осы бағыттағы жұмыстар жалғасып, құқық қорғау жүйесінің тиімділігі мен халықтың мемлекетке деген сенімін арттыруға бағытталған шаралар кезең-кезеңімен жүзеге асырылады.
