ҚАЗАҚСТАНДЫҚТАР 2027 ЖЫЛДАН БАСТАП ЖАПОНИЯДА ТЕГІН ОҚИ АЛАДЫ

Ғылым және жоғары білім министрлігінің мәліметінше, Tokyo Metropolitan University шетелдік азаматтарға арналған Tokyo Global Partner Scholarship Program (Tokyo GP) стипендиялық бағдарламасына өтінім қабылдайды. Бағдарлама Азия елдерінен білімді әрі болашағы зор студенттерді қолдауға бағытталған.

Бағдарлама бойынша оқу 2027 жылдың 1 сәуірінде басталады.

Стипендия қандай мүмкіндік береді?

Tokyo GP бағдарламасына қабылданған студенттерге оқу кезеңінде бірқатар шығын толық немесе ішінара өтеледі. Атап айтқанда, қатысушылар:

• қабылдау емтиханының төлемінен босатылады;
• университетке түсу жарнасын төлемейді;
• оқу ақысын толық төлемейді;
• ай сайын 150 мың жапон иенасы көлемінде стипендия алады;
• халықаралық әуе билеттеріне жұмсалған шығынды өтеу мүмкіндігіне ие болады;
• Жапониядан тұрғын үй табуға байланысты қолдау алады.

Қаржылай қолдау магистратура студенттеріне екі жылға дейін, ал докторантурада оқитындарға үш жылға дейін беріледі.

Кімдер қатыса алады?

Бағдарламаға Азия елдерінде білім алып жатқан және Токио митрополиттік университетімен серіктестік байланысы бар жоғары оқу орындарының студенттері қатыса алады.

Сонымен қатар бағдарламаға тиісті елдердегі ғылыми-зерттеу ұйымдарының, мемлекеттік мекемелердің және компаниялардың қызметкерлері де үміткер бола алады.

Магистратураға түсу үшін кандидаттың бакалавр дәрежесі болуы қажет. Ал докторантураға үміткерлер магистр дәрежесіне немесе соған теңестірілген біліктілікке ие болуы тиіс.

Үміткерге қандай талап қойылады?

Бағдарламаға қатысқысы келетін кандидаттың GPA көрсеткіші кемінде 2,30 болуы керек.

Сонымен бірге үміткер ағылшын тілін кемінде CEFR B2 деңгейінде немесе жапон тілін JLPT N2 деңгейінде меңгергенін растауы қажет.

Бұдан бөлек, кандидат бағдарламаның аумақтық және серіктестік талаптарына сәйкес келуі тиіс.

Оқу тілі де маңызды. Университеттегі кейбір білім беру бағдарламалары тек жапон тілінде жүргізіледі. Сондықтан талапкер өзі таңдаған Graduate School мен нақты білім беру бағдарламасының тілдік талаптарын алдын ала тексеруі қажет.

Қандай мамандықтарды таңдауға болады?

Tokyo Metropolitan University құрамындағы бірнеше Graduate School бойынша білім алуға мүмкіндік бар. Олардың қатарында:

• Science;
• Urban Environmental Sciences;
• Systems Design;
• Human Health Sciences;
• басқа да магистратура және докторантура бағдарламалары бар.

Алайда нақты талаптар, оқу тілі және қабылдау шарттары таңдалған Graduate School мен бағдарламаға қарай өзгеруі мүмкін.

Қалай өтінім беруге болады?

Бағдарламаға қатысқысы келетін талапкер алдымен Токио митрополиттік университетіндегі өзіне сәйкес Graduate School мен Master’s немесе PhD бағдарламасын таңдауы керек.

Одан кейін сол факультеттің Application Guidelines құжатымен мұқият танысу қажет. Онда өтінім беру тәртібі, қажетті құжаттар, қабылдау талаптары және құжат тапсыру мерзімдері көрсетіледі.

Құжаттарды тапсыру мерзімі барлық бағдарлама үшін бірдей емес. Сондықтан кандидат нақты өзі таңдаған Graduate School белгілеген күндерді басшылыққа алуы тиіс.

Оқу 2027 жылдың сәуірінде басталады

Tokyo GP бағдарламасы бойынша жаңа оқу кезеңі 2027 жылдың 1 сәуірінде басталады. Яғни қазақстандық талапкерлер Жапонияда магистратура немесе докторантурада білім алып қана қоймай, оқу ақысы мен басқа да негізгі шығындарды өтейтін толық стипендиялық қолдауға ие бола алады.

Бағдарламаның нақты шарттары, қолжетімді мамандықтар, талаптар мен құжат тапсыру мерзімдері Tokyo Metropolitan University ресми сайтында жарияланған.