ҚҚС ӨСІМІ ШАРУАЛАРДЫҢ ШЫҒЫНЫН 4,6 МЛРД ТЕҢГЕГЕ АРТТЫРҒАН
Қазақстанда қосылған құн салығының 12 пайыздан 16 пайызға дейін өсуі ауыл шаруашылығы техникасын лизинг арқылы алған мыңдаған шаруашылықтың шығынын арттырды. Бұл мәселені Құрылтай депутаты, «Әділет» партиясы фракциясының мүшесі Ербол Данағұлов көтерді.
Депутат Құрылтай отырысында Премьер-министрдің орынбасары – Ұлттық экономика министрі Серік Жұманғаринге депутаттық сауал жолдап, ауыл шаруашылығы техникасын жаңартуға бағытталған мемлекеттік қолдаудың тиімділігін төмендетпеу үшін салықтық өзгерістерді қайта қарауды ұсынды.
Қазір мемлекет тарапынан шаруаларды қолдауға арналған бірнеше жеңілдетілген қаржыландыру тетігі жүзеге асырылып келеді. Атап айтқанда, 6 пайыздық жеңілдетілген несие мен лизингтік бағдарламалар ауыл шаруашылығы техникасының паркін жаңартуға мүмкіндік беріп отыр.
Алайда депутаттың айтуынша, жаңа Салық кодексінің күшіне енуіне байланысты ҚҚС мөлшерлемесінің 12 пайыздан 16 пайызға дейін көтерілуі бұл қолдаудың тиімділігіне кері әсер еткен.
«Бүгінде 6 пайыздық жеңілдетілген несие мен лизингтік бағдарламалар арқылы шаруаларға қолдау көрсетіліп жатыр. Бұл саладағы техниканы жаңартуға белгілі бір мүмкіндік беріп отыр. Алайда қабылданып жатқан шаралардың тиімділігіне кері әсер ететін мәселе бар», – деді Ербол Данағұлов.
Оның мәліметінше, салық мөлшерлемесінің өзгеруі лизинг арқылы ауыл шаруашылығы техникасын сатып алған шаруашылықтардың қаржылық жүктемесін арттырған. Атап айтқанда, «ҚазАгроҚаржы» АҚ арқылы техника алған 13 181 шаруашылықтың салықтық шығыны жалпы 4,6 млрд теңгеге ұлғайған.
Депутат бұл жағдайдың шаруалардың техника жаңарту мүмкіндігіне әсер етуі мүмкін екенін атап өтті. Себебі ауыл шаруашылығында техниканың уақытылы жаңартылуы өндіріс көлемін арттырумен қатар, жұмыс өнімділігі мен шаруашылықтардың бәсекеге қабілеттілігіне де ықпал етеді.
Мемлекеттік қолдау бағдарламалары арқылы шаруаларға жеңілдетілген қаржы ұсынылғанымен, салықтық жүктеменің артуы осы тетіктердің нақты тиімділігін төмендетуі мүмкін. Осыған байланысты Ербол Данағұлов салық саясатын ауыл шаруашылығын қолдау шараларымен өзара үйлестіру қажеттігін алға тартты.
Депутаттың депутаттық сауалының негізгі мақсаты – техника жаңартуға бағытталған мемлекеттік бағдарламалардың нәтижелілігін сақтау және шаруаларға түсетін қосымша қаржылық салмақты қайта қарау.
Қазіргі таңда ауыл шаруашылығы техникасын жаңарту мәселесі саладағы маңызды бағыттардың бірі болып отыр. Осы ретте салықтық өзгерістердің шаруашылықтардың шығынына әсерін ескеру және қолданыстағы қолдау механизмдерінің тиімділігін сақтау мәселесі күн тәртібіне шықты.
