ТРАМП БҰҰ МІНБЕРІНДЕ ИРАННЫҢ ЯДРОЛЫҚ ҚАРУҒА ИЕ БОЛУЫНА ЖОЛ БЕРМЕЙТІНІН МӘЛІМДЕДІ
АҚШ президенті Дональд Трамп Нью-Йоркте өтіп жатқан БҰҰ Бас Ассамблеясының 81-сессиясында сөз сөйлеп, АҚШ-тың Иранның ядролық қару жасауына жол бермейтінін мәлімдеді. Оның сөзінде Иранның ядролық бағдарламасы негізгі тақырыптардың біріне айналды.
Трамп өз сөзінде АҚШ-тың еркіндігіне тоқталып, елдің тәуелсіздік алғанына 250 жыл өткенін атап өтті.
«Еркіндік америкалықтарға оңай келген жоқ. 250 жылдан кейін де біз одан ешқашан бас тартпаймыз», – деді АҚШ президенті.
Одан кейін Трамп Иранның ядролық бағдарламасына қатысты ұстанымын білдірді. Ол өзінің саяси қызметінің алғашқы күнінен бері Иранның ядролық қаруға ие болуына жол бермеу ұстанымында екенін айтты.
«Иран ешқашан ядролық қаруға ие болмайды», – деді Дональд Трамп БҰҰ мінберінде.
АҚШ президенті бұған қоса Вашингтон мен Тегеран арасындағы келіссөздерге тоқталды. Оның айтуынша, АҚШ Иранға ядролық бағдарламасын тоқтату және терроризмді қолдаудан бас тарту талаптарымен экономикалық ынтымақтастық ұсынған, алайда Тегеран бұл ұсынысты қабылдамаған.
Трамп сонымен бірге Иранға қатысты келесі қадам бойынша «үлкен шешім» қабылдауы керек екенін айтты. Ол келісімге келу немесе Иран Ислам Республикасын жоюға бағытталған әрекеттердің бірін таңдау мәселесін көтерді. Бұл мәлімдемесі оның БҰҰ-дағы сөзінің ең қатаң тұстарының бірі болды.
АҚШ президенті Иранға қысымды жалғастыруға шақырып, өзге мемлекеттерді Тегеранды экономикалық оқшаулауға қосылуға үндеді. Оның сөзінше, Иран коммерциялық кемелерге шабуыл жасауды тоқтатып, ядролық қаруға қатысты жоспарларынан бас тартып, терроризмді қолдауды доғаруы қажет.
Трамптың БҰҰ Бас Ассамблеясындағы биылғы баяндамасында Иран мәселесімен қатар халықаралық қауіпсіздік, Таяу Шығыстағы жағдай, Украинадағы соғыс, АҚШ-тың сыртқы саясаты және халықаралық ұйымдардың қызметі де сөз болды.
Президенттің Иранға қатысты мәлімдемелері Вашингтон мен Тегеран арасындағы әскери және дипломатиялық текетірес жалғасып тұрған кезеңде жасалды. Трамп сөзінде ядролық бағдарламаны тоқтатуға бағытталған келісімге келу мүмкіндігін де жоққа шығармады.
