ТҮЛКІБАС АУДАНЫНДА ХАЛЫҚТЫ ЖҰМЫСПЕН ҚАМТУ ШАРАЛАРЫ КҮШЕЙТІЛУДЕ

Ауданның Жұмыспен қамту және әлеуметтік бағдарламалар бөлімі тұрғындардың табысын арттыруға, әлеуметтік көмекке тәуелділікті азайтуға және азаматтарды тұрақты еңбекке тартуға басымдық беріп отыр.

Бүгінде әлеуметтік қолдаудың басты мақсаты – тек жәрдемақы тағайындау ғана емес, азаматтардың өз табысын табуына мүмкіндік жасау. Осыған байланысты аудан көлемінде түсіндіру жұмыстары тұрақты түрде ұйымдастырылып, тұрғындарға мемлекет тарапынан ұсынылатын мүмкіндіктер жан-жақты таныстырылуда.

Әсіресе ауылдық округтерде өткізілетін кездесулерге ерекше көңіл бөлінуде. Мамандар тұрғындармен жүздесіп, еңбек етудің маңызын, өз әл-ауқатына жауапкершілікпен қараудың қажеттілігін түсіндіреді. Сонымен қатар қиын жағдайға тап болған отбасылардың әлеуметтік жағдайын жақсарту жолдары да кеңінен талқыланады.

Кездесулер барысында азаматтарға жұмыспен қамту шаралары туралы толық ақпарат беріледі. Атап айтқанда, бос жұмыс орындары, ақылы қоғамдық жұмыстар, жастар практикасы, әлеуметтік жұмыс орындары және кәсіптік оқыту бағдарламалары түсіндіріледі. Жұмыс іздеп жүрген азаматтарға өз мамандығы бойынша немесе жаңа кәсіпті меңгеру арқылы еңбек нарығына бейімделу мүмкіндіктері ұсынылады.

Мемлекеттік бағдарламалар арқылы кәсіп бастауға ниетті тұрғындарға да қолдау көрсетіледі. Мамандар кәсіпкерлік негіздерін оқыту, гранттар мен басқа да қолдау тетіктері туралы ақпарат беріп, қажетті кеңестерін ұсынады. Бұл азаматтардың жеке кәсібін ашып, тұрақты табыс табуына мүмкіндік береді.

Ауданда атаулы әлеуметтік көмек алатын отбасылармен де жеке жұмыстар жүргізіліп келеді. Әсіресе ұзақ уақыт бойы әлеуметтік көмек алып отырған азаматтардың еңбекке араласуына басымдық берілуде. Мамандар әр отбасының жағдайын жеке қарап, олардың жұмысқа орналасуына немесе кәсіптік оқуға қатысуына ықпал етеді. Қажет болған жағдайда жаңа мамандықты игеруге, кәсіп ашуға және әлеуметтік ортаға бейімделуге қолдау көрсетіледі.

Сонымен қатар Отбасының цифрлық картасындағы «Д» және «Е» санатына енгізілген отбасылардың жағдайын жақсарту бойынша да нақты жұмыстар қолға алынған. Бұл санаттағы азаматтарды жұмыспен қамтуға бағытталған шаралар күшейтіліп, олардың тұрақты табыс көзін қалыптастыруға басымдық берілуде. Нәтижесінде атаулы әлеуметтік көмекке мұқтаж азаматтардың санын кезең-кезеңімен азайту көзделіп отыр.

Мамандардың айтуынша, әлеуметтік қолдау тек материалдық көмек көрсетумен шектелмеуі тиіс. Ең бастысы – азаматтардың еңбекке араласуына жағдай жасап, өз мүмкіндігін пайдаланып, өмір сүру сапасын жақсартуына ықпал ету. Осы бағыттағы жұмыстар тұрғындардың белсенділігін арттырып, әлеуметтік жауапкершілігін күшейтуге негіз болады.

Түлкібас ауданында атқарылып жатқан бұл жұмыстар халықтың әл-ауқатын көтеруге бағытталған мемлекеттік саясаттың маңызды бөлігі саналады. Түсіндіру кездесулері арқылы тұрғындар жұмыспен қамту, кәсіптік білім алу және кәсіпкерлікті дамыту бағытындағы мүмкіндіктер туралы жан-жақты ақпарат алып, өздеріне тиімді жолды таңдауға мүмкіндік алады.

Жауапты мамандар алдағы уақытта да аудан аумағындағы ауылдық округтерде осындай кездесулерді тұрақты өткізіп, әлеуметтік көмекке мұқтаж азаматтарға қолдау көрсетуді жалғастырады.