ЖОЛҒА ШЫҚҚАН МАЛ ЖҮРГІЗУШІЛЕРГЕ ҚАУІП ТӨНДІРЕДІ
Полиция мал иелерін төрт түлікті қараусыз қалдырмай, қауіпсіздік талаптарын сақтауға шақырды. Жолға шығып кеткен мал жүргізушілер мен жолаушыларға елеулі қауіп төндіріп, жол-көлік оқиғасына себеп болуы мүмкін.
Әсіресе қараңғы уақытта және көлік қозғалысы қарқынды автомобиль жолдарында жайылып жүрген мал үлкен қауіп тудырады. Күтпеген жерден жолға шыққан жануарды жүргізушінің дер кезінде байқап, көлікті тоқтатуы немесе бағытынан бұруы қиын болуы мүмкін.
Осыған байланысты полиция мал иелеріне жануарларды қараусыз қалдырмай, олардың жайылымнан елді мекен аумағына және автомобиль жолдарына шығып кетпеуін қатаң бақылауды ескертеді.
Мал иелері төрт түлікті тиісті деңгейде күтіп-бағуды және жаюды қамтамасыз етіп, олардың жолға шығуына жол бермейтін қажетті шараларды қабылдауы керек. Бұл тек малдың жоғалуына немесе жарақаттануына жол бермеу үшін емес, жол қозғалысына қатысушылардың өмірі мен қауіпсіздігін сақтау үшін де маңызды.
Жол бойында қараусыз жүрген малды байқаған жүргізушілер де барынша сақтық танытып, жылдамдықты төмендетіп, қажет болған жағдайда қауіп туралы тиісті қызметтерге хабарлағаны жөн.
Полиция жол қауіпсіздігіне қатысты талаптарды сақтаудың маңызын еске салып, мал иелерін жауапкершілікпен қарауға шақырады.
Жол қауіпсіздігі – баршамызға ортақ жауапкершілік. Жүргізушілердің қырағылығы мен мал иелерінің жауапкершілігі жол-көлік оқиғаларының алдын алуға мүмкіндік береді.
