ПОРТУГАЛИЯ ЖЕҢІСІН ДИОГУ ЖОТАҒА АРНАДЫ
Португалия құрамасы әлем чемпионатының плей-офф кезеңінде Хорватияны жеңіп, келесі кезеңге жолдама алды
Алайда матчтан кейінгі ең әсерлі сәт ойын нәтижесінен кейін орын алды. Португалиялық футболшылар жеңісті өткен жылы жол апатынан қаза тапқан командаласы Диогу Жотаға арнады.
3 шілде күні Диогу Жота мен оның бауыры Андре Силваның Испаниядағы жол-көлік оқиғасында қаза тапқанына бір жыл толды. Осыған байланысты матч аяқталған соң Португалия құрамасының капитаны Криштиану Роналду алаңға Жота ұлттық құрамада киген 21-нөмірлі жейдені ұстап шықты. Ол қолын көкке көтеріп, жеңісті өмірден өткен досына арнады. Кейін бүкіл команда 21-нөмірлі жейдемен бірге естелік суретке түсіп, марқұм футболшының рухына тағзым етті.
Криштиану Роналду кейін өзінің Instagram парақшасында: «Біз бұл ойында Диогу мен Португалия үшін ойнадық. Алға!!!!» деген жазба жариялады. Бұл жазба аз уақыт ішінде миллиондаған қаралым жинап, әлем жанкүйерлерінің қолдауына ие болды.
Диогу Жота Португалия құрамасының негізгі ойыншыларының бірі саналды. Оның 21-нөмірлі жейдесі бүгінде ұлттық құрама үшін ерекше символға айналған. Жанкүйерлер де әлеуметтік желілерде футболшыны еске алып, отбасы мен жақындарына қолдау білдірді.
Еске салайық, Диогу Жота мен оның бауыры Андре Силва 2025 жылдың 3 шілдесінде Испанияның солтүстік-батысында болған жол-көлік апатынан көз жұмған болатын.
Енді Португалия құрамасы әлем чемпионатының келесі кезеңінде Испания құрамасына қарсы ойнайды. Екі команда арасындағы тартысты кездесу турнирдегі ең қызықты матчтардың бірі болмақ.
