СОЗАҚ АУДАНЫНДА «СПОРТ ЕСІРТКІГЕ ҚАРСЫ!» АКЦИЯСЫ БАСТАУ АЛДЫ
Бүгінде Созақ ауданында бұқаралық спортты дамыту, жастарды дене шынықтыруға баулу және салауатты өмір салтын қалыптастыру бағытында ауқымды жұмыстар жүргізілуде.
Спорт – адамның физикалық қабілетін арттырып қана қоймай, оның бойында тәртіп, жауапкершілік, табандылық және мақсатқа ұмтылу секілді маңызды қасиеттерді қалыптастырады. Әсіресе жасөспірімдер мен жастарды спортқа тарту – олардың бос уақытын тиімді ұйымдастырып, түрлі зиянды әдеттерден аулақ болуына ықпал ететін маңызды бағыттардың бірі. Осы мақсатта Созақ ауданында нашақорлық пен есірткі бизнесінің алдын алуға арналған бір айлық акция бастау алды.
Акцияның ашылу шарасы аудан орталығындағы «Достар» стадионында ұйымдастырылып, оған аудан жастары, спортшылар, полиция және медицина саласының қызметкерлері, еріктілер мен түрлі мекеме өкілдері қатысты. Аталған шара қоғамның әр саласын ортақ мақсатқа жұмылдырып, жастар арасында салауатты өмір салтын насихаттауға бағытталды. Қатысушылар спорт пен белсенді өмір салтының адам өміріндегі маңызы зор екенін көрсетіп, есірткіге қарсы өз ұстанымдарын білдірді.
«Спорт есірткіге қарсы!» ұранымен өткен іс-шара аясында түрлі спорттық жарыстар мен марафондық жүгіру ұйымдастырылды. Жарысқа қатысушылар жылдамдық пен төзімділік сынға түсетін бәсекеде өз мүмкіндіктерін байқап, жоғары дайындық деңгейін көрсетті. Әрбір қатысушы жарыс жолында жеңіске деген жігерін танытып, спорттың адамды шыңдайтын үлкен күш екенін дәлелдеді. Жарыс қорытындысында үздік нәтиже көрсеткен спортшылар арнайы марапаттарға ие болды.
Шара барысында аудан әкімінің орынбасары Алтын Күнтуқызы сөз сөйлеп, жастарды спортпен тұрақты айналысуға, өз денсаулығына жауапкершілікпен қарауға және зиянды әрекеттерден алыс болуға шақырды. Ол өз сөзінде спорт – жастардың дұрыс бағытта дамуына жол ашатын маңызды құрал екенін атап өтті. Сонымен қатар бір айлық акцияның негізгі мақсаты – жастардың бос уақытын тиімді ұйымдастыру, олардың спортқа деген қызығушылығын арттыру және есірткіге қарсы қоғамдық көзқарасты қалыптастыру екенін жеткізді.
Өз кезегінде Созақ аудандық полиция бөлімі басшысының орынбасары, полиция подполковнигі Нұрәділ Нұрланұлы жастар арасында есірткі қылмыстарының алдын алу жұмыстарын жүргізуде спорттық және түсіндіру шараларының маңызы зор екенін атап өтті. Ол жастардың саналы таңдау жасап, денсаулыққа зиян келтіретін әрекеттерден аулақ болуы үшін қоғам болып қолдау көрсету қажеттігін жеткізді.
Шара барысында Қазақстан Республикасының Мемлекеттік Әнұраны орындалып, аудандық «Мыңжылқы» мәдениет үйінің өнерпаздары патриоттық әндер шырқады. Спорт пен өнерді қатар ұштастырған іс-шара қатысушылардың бойында отансүйгіштік рухты қалыптастырып, қоғамдағы бірлік пен жауапкершілік құндылықтарын дәріптеді.
Бүгінде Созақ ауданында спорт инфрақұрылымын дамытуға, жас спортшыларға қолдау көрсетуге және бұқаралық спортты кеңінен насихаттауға ерекше назар аударылып келеді. Аудандағы спорт мектептері мен спорт нысандарында жүздеген жасөспірім әртүрлі спорт түрлерімен тұрақты түрде шұғылданып, өз шеберліктерін шыңдауда. Осындай жүйелі жұмыстардың нәтижесінде созақтық спортшылар аудандық, облыстық және республикалық жарыстарда жоғары жетістіктерге қол жеткізіп, өңірдің спорттық әлеуетін танытып келеді. Жастардың спортқа деген қызығушылығын арттыруға бағытталған мұндай шаралар олардың бос уақытын тиімді ұйымдастыруға және зиянды әдеттерден алшақ болуына үлкен ықпал етеді.
Бүгінде аудан көлемінде түрлі спорттық жарыстар, марафондар мен бұқаралық іс-шаралар тұрақты түрде өткізіліп келеді. Мұндай бастамалар жастардың спортқа деген қызығушылығын арттырып қана қоймай, олардың денсаулығын нығайтып, белсенді өмір салтын ұстануына жағдай жасайды. Спорттық ортада тәрбиеленген жас буын тәртіпке бейім, жауапкершілігі жоғары әрі өз мақсатына ұмтылатын азамат болып қалыптасады.
Спорт – денсаулықтың кепілі ғана емес, ол жастардың дұрыс өмірлік ұстанымын қалыптастыратын үлкен тәрбие мектебі. Сондықтан «Спорт есірткіге қарсы!» секілді акциялардың маңызы ерекше. Мұндай шаралар арқылы жастар спорттың жарқын болашаққа бастайтын жол екенін түсініп, зиянды әдеттерден бойын аулақ ұстауға ұмтылады.
Бір айлық акция аясында алдағы уақытта да аудан көлемінде түрлі спорттық сайыстар, кездесулер және жастарға арналған профилактикалық шаралар ұйымдастырылып, салауатты өмір салтын дәріптеу жұмыстары жалғасын табатын болады. Осындай кешенді жұмыстар арқылы Созақ ауданында спортпен айналысатын белсенді жастардың қатары артып, дені сау, саналы әрі отансүйгіш ұрпақ қалыптасуына негіз қаланады.
