СОЗАҚТА ЕЛ МЕРЕЙІН АСҚАҚТАТҚАН ЖАС СПОРТШЫЛАРҒА ҚҰРМЕТ КӨРСЕТІЛДІ

Аудан көлемінде балалар мен жасөспірімдер спорт мектептерінің жұмысы жүйелі түрде жүргізіліп, жас спортшылардың кәсіби шеберлігін шыңдауына қажетті жағдайлар жасалуда. Соның нәтижесінде созақтық спортшылар облыстық, республикалық және халықаралық деңгейдегі жарыстарда жоғары нәтижелер көрсетіп, туған өлкенің абыройын асқақтатып жүр. Жас спортшылардың әрбір жеңісі – олардың жеке жетістігі ғана емес, сондай-ақ бапкерлердің табанды еңбегі мен аудан спортындағы жүйелі жұмыстың нақты нәтижесі. Осындай жетістіктерге қол жеткізген спортшыларды қолдау, олардың еңбегін бағалау және кейінгі буынға үлгі ету мақсатында аудан әкімі Мұхит Тұрысбеков жеңімпаздар мен жүлдегерлерді арнайы қабылдап, құрмет көрсетті.

Кездесу барысында аудан басшысы жас спортшылармен ашық әрі еркін форматта пікір алмасып, олардың спорттағы жетістіктері, алдағы мақсаттары мен халықаралық деңгейдегі жарыстарға дайындығы туралы әңгімелесті. Жас спортшылар өздерінің дайындық барысы, күнделікті жаттығулары және алдағы жоспарларымен бөлісті. Аудан әкімі әрбір үлкен жетістіктің артында үздіксіз еңбек, темірдей тәртіп пен қажырлы дайындық жататынын атап өтіп, жастардың таңдаған спорт жолында ешқашан тоқтап қалмай, жаңа белестерді бағындыруына тілектестік білдірді. Сонымен қатар ауданда спорт саласын дамыту, жас спортшыларға қолдау көрсету және спорттық инфрақұрылымды жақсарту бағытындағы жұмыстар алдағы уақытта да жалғаса беретінін жеткізді.

Кездесу аясында аудан намысын республикалық және халықаралық ареналарда лайықты қорғаған жауынгерлік самбо, гір спорты және стритбол 3х3 баскетболы бойынша жеңімпаздар мен жүлдегерлерге, сондай-ақ олардың бапкерлеріне аудан әкімінің арнайы алғыс хаттары мен сый-сияпаттары табыс етілді. Бұл құрмет – спортшылардың ұзақ уақыт бойғы еңбегі мен төккен терінің жемісіне берілген жоғары баға. Мұндай қолдау жас спортшылардың жігерін арттырып, олардың алдағы уақытта бұдан да биік белестерді бағындыруына үлкен серпін береді.

Атап айтқанда, Қостанай облысының Лисаковск қаласында өткен Қазақстан Республикасының самбо күресінен 23 жасқа дейінгі жастар арасындағы жауынгерлік самбо чемпионатында 80 келі салмақ дәрежесінде чемпион атанған Ұлболсын Адилованың жеңісі ерекше атап өтілді. Жас спортшы тартысты белдесулер барысында өзінің жоғары дайындық деңгейін, техникалық шеберлігі мен қайсар мінезін көрсетіп, Қазақстан чемпионы атағын жеңіп алды. Бұл жетістік – Созақ ауданындағы самбо спортының дамып келе жатқанын көрсететін маңызды нәтиже.

Сонымен қатар гір спортынан халықаралық жарыстарда ел намысын абыроймен қорғаған спортшылардың жетістіктері де жоғары бағаланды. Ақтау қаласында өткен Азия чемпионатында жеңіс тұғырынан көрініп, құрлық чемпионы атанған Ержан Қабылбек пен Еркебұлан Ергешбайдың, Азия чемпионы және әлем чемпионатының қола жүлдегері атанған Сырым Құдайбергеннің жетістіктері аудан жұртшылығы үшін үлкен мақтаныш болды. Сондай-ақ Бішкек қаласында өткен әлем чемпионатында күміс жүлде иеленген Мағжан Тамабай мен қола жүлдегер Нұрдәулет Қанаттың көрсеткен нәтижелері де аудан спортындағы жоғары дайындықтың айқын көрінісі ретінде бағаланды.

Кездесу барысында Қыземшек кентінен арнайы келген стритбол 3х3 баскетболынан Қазақстан Республикасының чемпиондары атанған жас спортшылар да ерекше құрметке ие болды. Командалық спорт түрінен жоғары нәтиже көрсету – ойыншылардың шеберлігімен қатар, өзара түсіністік пен ұйымшылдықтың жемісі. Жас баскетболшылардың республикалық деңгейдегі жеңісі Созақ ауданында тек жекелей спорт түрлері ғана емес, командалық ойындардың да қарқынды дамып келе жатқанын дәлелдейді.

Бүгінде Созақ ауданында спорттың әртүрлі бағыттары бойынша кешенді жұмыстар жүзеге асырылып келеді. Аудандағы спорт мектептерінде көптеген жасөспірімдер тұрақты түрде жаттығып, тәжірибелі бапкерлердің жетекшілігімен шеберліктерін арттыруда. Футбол, күрес, бокс, гір спорты, баскетбол және ұлттық спорт түрлері бойынша тәрбиеленіп жатқан жас спортшылар түрлі деңгейдегі жарыстарда аудан мерейін үстем етіп келеді. Спорт нысандарының жаңаруы, бұқаралық спорттың дамуы және жастарға жасалып жатқан қолдау – осы жетістіктердің басты негізі болып табылады.