МЕМЛЕКЕТ БАСШЫСЫ ҚҰРЫЛТАЙДЫҢ БІРІНШІ СЕССИЯСЫНЫҢ АШЫЛУЫНА ҚАТЫСТЫ

Мемлекет басшысы Құрылтай депутаттарын алғашқы сессияның ашылуымен құттықтап, бүгінгі күннің ел тарихындағы айрықша мәніне тоқталды.

«Бүгін еліміз өзінің даму жолында аса маңызды кезеңге аяқ басты. Бұл – мемлекетіміз үшін мән-мағынасы айрықша оқиға, тарихи сәт. Біз ұлт жылнамасының жаңа парағын ашып отырмыз», – деді Қасым-Жомарт Тоқаев.

Президенттің айтуынша, Құрылтайдың ресми түрде жұмысқа кірісуі жалпыұлттық референдумда Қазақстан халқы қолдаған жаңа Конституцияның негізінде жүзеге асып отыр. Осылайша, елдің бір палаталы заң шығарушы органы өз қызметін бастап, Қазақстанның саяси жүйесін жаңғыртудың жаңа кезеңіне жол ашылды.

Қасым-Жомарт Тоқаев Құрылтай институтының тарихи негізіне де назар аударды. Қазақ халқының дәстүрлі мемлекеттік құрылымында Құрылтай ел тағдырына қатысты маңызды мәселелер талқыланатын, ортақ шешімдер қабылданатын институт ретінде ерекше орын алған. Бүгінде бұл ұғым жаңа мазмұнмен толықтырылып, заманауи мемлекеттік басқару жүйесінің маңызды буыны ретінде қалыптасып отыр.

Мемлекет басшысы жаңа заң шығарушы органның елдің саяси жүйесін түбегейлі жаңғыртуға ықпал ететінін атап өтті. Оның пікірінше, Құрылтайдың қызметі мемлекеттік аппарат жұмысына тың серпін беріп, ұлттық заңнаманың сапасын арттыруға және мемлекеттің құқықтық негізін одан әрі нығайтуға мүмкіндік береді.

«Себебі Құрылтай билік жүйесін түбегейлі жаңғыртады, бүкіл мемлекеттік аппараттың жұмысына тың серпін береді. Құрылтай ұлттық заңнама сапасын арттыру арқылы еліміздің құқықтық негізін нығайта түседі», – деді Президент.

Бірінші шақырылымдағы Құрылтай депутаттарының алдында осындай ауқымды міндеттер тұр. Олар жаңа саяси институттың қалыптасу кезеңіндегі алғашқы шешімдерді қабылдап, оның алдағы қызметінің негізгі бағыттарын айқындауға атсалысады. Сондықтан алғашқы шақырылым депутаттарының жұмысы Құрылтайдың болашақтағы беделі мен тиімділігіне тікелей әсер етпек.

Президент бұл міндеттің ерекше жауапкершілік жүктейтінін айтып, депутаттарға елдің сенімін ақтау қажеттігін жеткізді.

«Осы тарихи миссияны атқару сіздерге жүктеліп отыр. Құрылтайдың бірінші шақырылымының депутаты болу – ең алдымен, ерекше сәт. Бұл – үлкен бақыт деп айтсақ, қате болмас», – деді Қасым-Жомарт Тоқаев.

Мемлекет басшысы жаңа шақырылым депутаттарына өздеріне жүктелген міндетті абыроймен атқаратынына сенім білдірді.

«Осы аса абыройлы атқа сай лайықты қызмет етесіздер деп сенемін!» – деді Президент.

Бірінші шақырылымдағы Құрылтайдың алғашқы сессиясының ашылуы Қазақстанның саяси дамуындағы жаңа кезеңнің басталуын білдіреді. Жаңа Конституция негізінде қалыптасқан бір палаталы заң шығарушы орган енді елдің құқықтық жүйесін жетілдіруге, мемлекеттік басқарудың тиімділігін арттыруға және қоғам үшін маңызды мәселелерді заңнамалық тұрғыдан шешуге бағытталған жұмыстарды жүзеге асырады.