АТЫРАУ ӘКІМІ ШӘКІР КЕЙКИН ҚЫЗМЕТІНЕН КЕТТІ
Шәкір Кейкин Атырау қаласының әкімі қызметінен кетті. Бұл ақпаратты Атырау облысының әкімдігі растады. Шенеуніктің отставкаға кету себебі әзірге ресми түрде түсіндірілген жоқ.
Атырау облысы әкімдігі редакция сауалына қысқа жауап беріп, Шәкір Кейкиннің қызметтен кеткенін растаған.
Кейкин Атырау қаласын 2023 жылғы 10 шілдеден бері басқарды. Үш жылға жуық уақыт қызмет атқарған әкімнің орнына кім тағайындалатыны әзірге белгісіз.
Шәкір Кейкиннің қызметтен кетуі оның екі орынбасарына қатысты болған қылмыстық істермен тұспа-тұс келіп отыр. Алайда әкімнің өзіне бұл істер бойынша қандай да бір айып тағылғаны туралы ақпарат жоқ.
Бұған дейін шілде айында Ұлттық қауіпсіздік комитетінің қызметкерлері Атырау қаласы әкімінің орынбасары Тілек Махуовты ұстағаны белгілі болған. Ол 100 миллион теңге көлемінде пара алды деген күдікке ілінген.
Кейін әкімнің тағы бір орынбасары Мейіржан Мұқасовқа қатысты да сыбайлас жемқорлық ісі бойынша тергеу әрекеттері жүргізілген. Ол жауап алынғаннан кейін босатылған. Осы іс аясында Шәкір Кейкиннің өзі де жауап алуға шақырылған. Дегенмен оған қатысты қылмыстық іс қозғалғаны немесе қандай да бір айып тағылғаны туралы ресми мәлімет жоқ.
Кейкиннің қызметтен кетуі бұған дейінгі бірқатар қоғамдық даулардан кейін де назар аудартып отыр. Оның қала әкімі болған кезеңінде Атырауда көгершіндерге қатысты мәселе, «Үш кербез» ескерткішінің орнын ауыстыру, қала көшелеріне отырғызылған канадалық шыршалар, жағалаудың жағдайы және өзге де абаттандыру мәселелері қызу талқыланған еді.
Шәкір Кейкиннің отставкасы Атырау облысындағы кадрлық өзгерістер кезеңімен де сәйкес келіп отыр. Биыл шілде айында Атырау облысының әкімі де ауысты. Бұған дейін өңірді басқарған Серік Шәпкеновтің орнына бұрынғы энергетика министрі Болат Ақшолақов тағайындалды.
Әзірге Атырау қаласының жаңа әкімі туралы ресми ақпарат жарияланған жоқ. Жаңа әкімнің кандидатурасы кейінірек белгілі болады.
