САУРАН АУДАНЫНДА ХАЛЫҚАРАЛЫҚ ИНВЕСТИЦИЯЛЫҚ ЖОБАЛАРДЫ ЖҮЗЕГЕ АСЫРУҒА ЖОЛ АШЫЛДЫ
Қазақстан мен Өзбекстан арасындағы стратегиялық әріптестік пен бауырластық байланыстар соңғы жылдары жаңа деңгейге көтеріліп келеді. Әсіресе, шекаралас өңірлер арасындағы сауда-экономикалық ынтымақтастықты дамыту, инвестициялық жобаларды бірлесіп жүзеге асыру және кәсіпкерлік байланыстарды нығайту бағытындағы жұмыстар қарқын алған.
Осы мақсатта мамыр айында Өзбекстан Республикасының Ташкент облысында «Шекарасыз ынтымақтастық» атты ауқымды бизнес-форум ұйымдастырылды.
Халықаралық деңгейдегі маңызды іс-шараға Түркістан облысының делегациясы қатысып, оның құрамында Сауран ауданы әкімдігінің өкілдері мен жергілікті кәсіпкерлер де болды. Форум аясында екі ел арасындағы өңіраралық байланыстарды кеңейту, өндірістік кооперацияны дамыту және жаңа инвестициялық жобаларды жүзеге асыру мәселелері кеңінен талқыланды.
Форумның алғашқы күнінде Қазақстан Республикасы Президентінің өңіраралық ынтымақтастықты дамыту жөніндегі тапсырмасы аясында маңызды келісімге қол қойылды. Атап айтқанда, Түркістан облысының әкімі Нұралхан Көшеров пен Өзбекстан Республикасы Ташкент облысының әкімі Зойир Мирзаев бауырластық қарым-қатынастарды дамыту туралы меморандумға қол қойып, екі өңір арасындағы әріптестікті жаңа деңгейге көтеруге бағытталған нақты қадамдарды айқындады.
Кездесу барысында тараптар сауда-экономикалық байланыстарды кеңейту, кәсіпкерлік субъектілерін қолдау, инвестиция тарту және өндірістік кооперацияны дамыту бағыттарындағы мәселелерді жан-жақты талқылады. Сонымен қатар ауыл шаруашылығы, қайта өңдеу өнеркәсібі, азық-түлік өндірісі, логистика және өндіріс салаларында бірлескен жобаларды жүзеге асыру мүмкіндіктері қарастырылды.
Форум барысында екі ел кәсіпкерлері арасында іскерлік кездесулер ұйымдастырылып, тәжірибе алмасу алаңы қалыптасты. Өзбекстандық және қазақстандық кәсіпкерлер өзара тиімді әріптестік орнатуға қызығушылық танытып, жаңа жобаларды іске асыру бойынша ұсыныстарын ортаға салды. Бұл өз кезегінде екі өңір арасындағы кәсіпкерлік байланысты нығайтып, шағын және орта бизнестің дамуына жаңа мүмкіндік береді.
Іс-шара аясында бизнес өкілдері үшін қолайлы жағдай қалыптастыру мәселесіне ерекше назар аударылды. Әсіресе, инвесторларға қолдау көрсету, өндірістік алаңдарды дамыту, логистикалық мүмкіндіктерді кеңейту және кедендік рәсімдерді жеңілдету бағытындағы нақты қадамдар талқыланды. Мұндай бастамалар шекаралас аумақтардың экономикалық әлеуетін арттыруға және инвестициялық тартымдылығын күшейтуге мүмкіндік береді.
Мамандардың пікірінше, Түркістан және Ташкент облыстары арасындағы ынтымақтастықтың нығаюы екі өңірдің ғана емес, жалпы Қазақстан мен Өзбекстан арасындағы экономикалық байланыстың дамуына оң әсер етеді. Әсіресе, ауыл шаруашылығы өнімдерін қайта өңдеу, өндіріс орындарын ашу және бірлескен инвестициялық жобаларды жүзеге асыру арқылы жаңа жұмыс орындарын құруға мүмкіндік туады.
Сауран ауданының өкілдері де форум барысында бірқатар кәсіпкерлермен және өндіріс орындарының басшыларымен кездесулер өткізіп, өзара тәжірибе алмасу мен инвестициялық жобаларды жүзеге асыру мәселелерін талқылады. Аудан кәсіпкерлері өндіріс, ауыл шаруашылығы және қайта өңдеу салаларындағы жаңа технологиялармен танысып, бірлескен жобаларды іске асыруға қызығушылық білдірді.
Айта кету керек, соңғы жылдары Қазақстан мен Өзбекстан арасындағы стратегиялық серіктестік барлық салада қарқынды дамып келеді. Мемлекет басшылары деңгейінде қабылданған келісімдер өңіраралық ынтымақтастықтың нығаюына және экономикалық байланыстың кеңеюіне негіз болуда. Бұл өз кезегінде шекаралас өңірлердің дамуына тың серпін беріп отыр.
Жалпы, «Шекарасыз ынтымақтастық» бизнес-форумы – екі ел арасындағы экономикалық және кәсіпкерлік байланысты нығайтуға бағытталған маңызды алаңдардың бірі. Форум аясындағы келіссөздер мен кездесулер алдағы уақытта жаңа бірлескен жобаларды жүзеге асыруға, инвестиция көлемін арттыруға және Қазақстан мен Өзбекстан арасындағы достық пен ынтымақтастықты одан әрі тереңдетуге негіз қаламақ.
