АТЫРАУДА МАС ЕР АДАМ ЖЕДЕЛ ЖӘРДЕМ КӨЛІГІНДЕ ДӘРІГЕРДІ ҰРМАҚ БОЛДЫ
Атырауда дәрігерлерге күш көрсету фактісі тағы да тіркелді. Бұл жолы оқиға жедел жәрдем көлігінің ішінде болған.
3 қазан күні әлеуметтік желілерде тараған бейнежазбада әскери формаға ұқсас киім киген ер адамның фельдшерге қол көтерген сәті анық көрінеді. Куәгерлердің айтуынша, ер адам қатты мас болған.
Оқиға қалай болды?
2 қазан күні қала тұрғындары Toyota Highlander көлігінің ішінде ес-түссіз күйде отырған екі ер адамды байқап, жедел жәрдем шақырған. Оқиға орнына келген медицина қызметкерлері екеуінің де қатты мас болғанын анықтаған.
Солардың бірі полицияға бірден тапсырылса, екіншісі 29 жастағы атыраулық аяғынан жарақат алғандықтан жедел жәрдем көлігіне отырғызылған. Алайда ол медицина қызметкерлеріне бағынбай, ашуланып, фельдшерге жұдырық ала жүгірген.
Әлеуметтік желідегі видеодан мас адамның көліктің ішінде айғайлап, фельдшерді ұрып-соқпақ болғаны анық көрінеді. Полиция қызметкері араласып, оны тоқтатады.
«Құқық қорғау органдарына қатысы жоқ»
Көпшілікті ер адамның әскери формаға ұқсас киімде болғаны алаңдатқан еді. Алайда Атырау облыстық полиция департаменті оның құқық қорғау органдарына ешқандай қатысы жоқ екенін ресми мәлімдеді.
Қазіргі таңда оған қатысты қылмыстық іс қозғалып, материалдар сотқа жолданды.
Бұл — дәрігерлерге күш көрсету бойынша алғашқы жағдай емес.
Соңғы жылдары мұндай оқиғалар жиілеп кеткен. 2024 жылы Алматыда жедел жәрдем фельдшері мас науқастың туысының қол көтеруіне ұшырап, басынан жарақат алған. Шымкентте жедел жәрдем бригадасын науқастың туыстары үйдің ішінде сабап тастады. Сол кезде дәрігерлер қауіпсіздік күзетінің жоқтығына шағымданған. Қарағанды облысында психикалық ауытқуы бар ер адам дәрігерді пышақпен қорқытып, жедел жәрдем көлігінен түсірмей қойған жағдай тіркелген.
Дәрігерлер қоғам алдында жауапкершілігі зор мамандық иелері болғанымен, өздерінің қауіпсіздігіне кепілдік жоқ екенін айтып келеді.
