ҚАЗАҚСТАН ПОЛИЦИЯСЫНДА 20 МЫҢНАН АСТАМ ҚЫЗМЕТКЕР ЖЕТІСПЕЙДІ
Қазақстанның полиция жүйесінде 20 мыңнан астам қызметкер жетіспейді. Бұл туралы Ішкі істер министрінің орынбасары Игорь Лепеха Үкімет отырысынан кейінгі брифингте мәлімдеді.
Вице-министрдің айтуынша, әсіресе патрульдік полиция, учаскелік полиция инспекторлары және кәмелетке толмағандар ісі жөніндегі инспекторлар арасында кадр тапшылығы байқалады.
«Қазіргі уақытта бізге патрульдік полиция қызметкерлері, учаскелік инспекторлар және кәмелетке толмағандар ісі жөніндегі инспекторлар жетіспейді. Оның ішінде патрульдік полицияға кемінде 10 мың маман қажет», – деді Игорь Лепеха.
Оның сөзінше, аталған бөлімшелердің қызметкерлері жергілікті бюджет есебінен қаржыландырылады. Осыған байланысты Ішкі істер министрлігі әкімдіктермен бірлесіп, полиция қызметкерлерінің штат санын кезең-кезеңімен арттыру мүмкіндігін қарастырып жатыр.
«Президент Әкімшілігі мақұлдап, Үкімет қолдаса, келесі жылдан бастап штатты кезең-кезеңімен арттыру мәселесін қолға алатын боламыз», – деді министрдің орынбасары.
Игорь Лепеханың нақтылауынша, жергілікті әкімшілік полиция қызметкерлерінің жалпы тапшылығы 20 мыңнан асады. Ал патрульдік полицияның өзіне кемінде 10 мың қызметкер қажет.
Министрлік бұл мәселені жергілікті атқарушы органдармен бірлесіп кезең-кезеңімен шешуді жоспарлап отыр.
