БҰҚАРАЛЫҚ ЖҮРГІРУ МАРАФОНЫ ӨТТІ

Ауданда бұқаралық спортты дамыту, тұрғындарды салауатты өмір салтын ұстануға, спортпен шұғылдануға тарту мақсатында ұйымдастырылған марафон «Қабыз бен домбыра» композициялық кешенінен бастау алып, аудан орталығындағы «Әл Фараби» алаңында қорытындыланды.

Спорттық шараға аудан әкімі Қайрат Жолдыбайұлы арнайы қатысып, спортты жанына серік еткен марафонға қатысушыларды мемлекеттік мерекемен құттықтап, жеңімпаздарды марапаттады.

Аудан басшысы құттықтау сөзінде: «Сіздерді ұлттық мерекеміз 25 қазан — Республика күнімен шын жүректен құттықтаймын. Мемлекет басшысы Қасым Жомарт-Тоқаев Қазақстан халқына арнаған Жолдауларында ұлт денсаулығын бекемдеу мәселесі өте өзекті екенін айтып, барлық жас санаты арасында бұқаралық спорт түрлерін насихаттай беру керектігін атап өткен болатын. Осы мақсатта ауданда бұқаралық спортты дамытуға ерекше мән беріліп, спорт кешендерінің жүйесі кеңейе түсуде. Спорт мектептері мен спорт үйірмелерінде дене шынықтырумен шұғылданушылар саны артып келеді. Аудан тұрғындарын салауатты өмір салтын ұстануға, спортпен шұғылдануға тартуда бүгінгі бұқаралық жүгіру марафонының маңызы зор деп санаймын. Ендеше бүгінгі жүгіру марафонына қатысушыларды мемлекеттік мерекеміз Республика күнімен шын жүректен құттықтай отырып, дендеріңізге саулық, отбасыларыңызға амандық, құт-береке тілеймін»-деді.

Жүгіру марафонына 63 жастағы Пердебай Еркінов те қатысып, 40 жастан асқан тұрғындар арасында алғашқылардың бірі болып келді. Ауданда өткен бұқаралық спорттық шараларға жыл сайын қатысып, спорттың адам денсаулығына пайдасы көп екенін насихаттап жүрген Шәуілдір ауылының тұрғыны биыл да арнайы марапатқа ие болды.

Жарыс нәтижесінде 40 жасқа дейінгі тұрғындар арасында ағайынды Дәулет және Сәулет Дулатовтар жүлделі І және ІІ орындарға ие болса, Ақниет Әбдірасул ІІІ орын иегері атанды. Сондай-ақ, 40 жастан асқан ересектер арасындағы жарыста Омар Маханов І орын, Ерғали Дүйсенбаев пен Жандос Момышовтар ІІ және ІІІ орындарды иеленді.

Шара барысында жарыс жеңімпаздары мен жүлдегерлеріне арнайы сыйлықтар мен аудан әкімінің алғыс хаттары табысталды.