ОТЫРАРДА «TUR WORKOUT – ТӘРТІПКЕ ТАРТЫЛ» ЖАСТАР ТУРНИРІ ӨТТІ

Ауқымды іс-шара Мемлекет басшысы Қасым-Жомарт Тоқаевтың «Заң мен тәртіп» қағидатын іске асыру аясында ұйымдастырылды.

Жоба Түркістан облысы әкімдігінің қолдауымен, Түркістан облысы бойынша Экономикалық тергеп-тексеру департаменті мен Жастар ресурстық орталығының бірлескен бастамасы ретінде жүзеге асты. Оның басты мақсаты – жастарды спорт арқылы тәртіпке, жауапкершілікке тәрбиелеу, құқық бұзушылықтың алдын алу және қоғамда заңға құрмет мәдениетін қалыптастыру.

Қазіргі таңда жастардың бос уақытын тиімді ұйымдастыру, оларды пайдалы істерге тарту және түрлі құқық бұзушылықтардың алдын алу – қоғамдағы маңызды міндеттердің бірі. Осындай жобалар жастардың өз қабілетін шыңдап қана қоймай, олардың өмірге деген көзқарасын қалыптастыруға, белсенді азаматтық ұстанымын нығайтуға да ықпал етеді.

Іс-шараның ашылу салтанатына Түркістан облысы бойынша Экономикалық тергеп-тексеру департаментінің басқарма басшысы, экономикалық тергеп-тексеру қызметінің подполковнигі Абай Бауыржанұлы Қадыров пен Отырар ауданы әкімінің орынбасары Айдос Құлмаханов қатысты. Олар жастарға сәттілік тілеп, мұндай жобалардың маңыздылығына тоқталды. Сондай-ақ бүгінгі таңда заң талаптарын сақтау, адал еңбек ету және қоғам алдындағы жауапкершілікті сезіну әрбір жас үшін маңызды екенін атап өтті.

Жоба аясында жастармен арнайы кездесу ұйымдастырылып, профилактикалық және құқықтық түсіндіру жұмыстары жүргізілді. Мамандар қазіргі кезде кеңінен таралып отырған интернет-алаяқтықтың түрлері, дропперліктің қауіптілігі, жеке мәліметтерді қорғау және қаржылық қауіпсіздік мәселелері жөнінде жан-жақты ақпарат берді.

Кездесу барысында жастарға бөтен адамдардың өтінішімен банк картасын немесе жеке есепшотын пайдалануға берудің заң алдындағы жауапкершілікке әкелуі мүмкін екені түсіндірілді. Сонымен қатар әлеуметтік желілерде кездесетін күмәнді ұсыныстарға сенбеу, жеке деректерді бөгде адамдарға жарияламау және кез келген қаржылық операция кезінде сақтық таныту қажеттігі айтылды. Мұндай түсіндіру жұмыстары жастардың құқықтық сауатын арттырып, түрлі алаяқтық әрекеттердің құрбаны болмауына бағытталды.

Іс-шараның негізгі бөлігі – воркаут бойынша өткен спорттық турнир болды. Жарысқа қатысқан жастар өздерінің күш-қайратын, ептілігі мен дайындық деңгейін көрсетті. Қатысушылар арасындағы тартысты бәсеке көрермендердің қызығушылығын арттырып, спорттың жастар өміріндегі маңызын тағы бір мәрте дәлелдеді.

Ұйымдастырушылардың айтуынша, мұндай спорттық жобалардың негізгі мақсаты – жеңімпазды анықтау ғана емес. Ең бастысы – жастарды спортпен тұрақты айналысуға ынталандыру, бос уақытын тиімді өткізуге жағдай жасау және оларды тәртіпке, табандылыққа, жауапкершілікке тәрбиелеу. Спорт адамның денсаулығын нығайтып қана қоймай, мінезін қалыптастырып, кез келген іске жауапкершілікпен қарауға үйретеді.

Турнир қорытындысы бойынша үздік нәтиже көрсеткен жастар облыстық финалдық кезеңге жолдама алды. Бірінші орынды Есен Батырхан иеленсе, екінші орын Талғат Айбекке бұйырды. Ал үшінші орынды Медеубек Болатбек жеңіп алды. Жеңімпаздар арнайы марапатталып, алдағы облыстық кезеңде Отырар ауданының намысын қорғайтын болды.

Мұндай жобалар жастар арасында салауатты өмір салтын насихаттап қана қоймай, заң мен тәртіп қағидатын күнделікті өмірде ұстанудың маңызын түсіндіруге де үлкен үлес қосады. Себебі қоғамның дамуы – білімді, белсенді әрі жауапкершілігі жоғары жастардың қолында. Ал спорт пен құқықтық тәрбиені қатар дәріптейтін бастамалар осы мақсатқа жетудің тиімді жолдарының бірі.

Отырар ауданында жастарды қолдауға және олардың жан-жақты дамуына бағытталған мұндай іс-шаралар алдағы уақытта да жалғасын табады. Бұл өз кезегінде өскелең ұрпақтың бойында заңға құрмет, елге деген жанашырлық және салауатты өмір салтын ұстану мәдениетін қалыптастыруға ықпал етпек.