ҚОШАНОВ ҚАЗАҚСТАН ХАЛЫҚ КЕҢЕСІНІҢ ТӨРАҒАСЫ БОЛДЫ
Мемлекет басшысы Қасым-Жомарт Тоқаев Қазақстан Халық Кеңесінің алғашқы сессиясында сөз сөйлеп, жаңа консультативтік мекеменің жұмысына қатысты бірқатар міндетті атап өтті. Сессия барысында Президент Қазақстан Халық Кеңесінің Төрағасы лауазымына Ерлан Қошановтың кандидатурасын ұсынды. Дауыс беру қорытындысы бойынша Ерлан Қошанов Халық Кеңесінің Төрағасы болып сайланды.
Қасым-Жомарт Тоқаев бұл лауазымның конституциялық мәртебесі бар екенін атап өтіп, Халық Кеңесінің Төрағасы қоғам мен мемлекеттік билік арасындағы өзара байланысты нығайтуға ықпал ететін тұлға болуы керек екенін айтты.
Президенттің пікірінше, Ерлан Қошановтың мемлекеттік қызметтегі көпжылдық тәжірибесі мен жауапкершілігі жоғары қызметтер атқаруы оның жаңа міндетті орындауына мүмкіндік береді.
«Осының бәрін ескере отырып, мен Ерлан Жақанұлы Қошановтың кандидатурасын ұсынамын. Бұл азаматты бәріңіз жақсы білесіздер, жауапкершілігі жоғары, білікті, тәжірибесі мол тұлға», – деді Мемлекет басшысы.
Қасым-Жомарт Тоқаев Ерлан Қошановтың мемлекеттік қызмет жүйесінде ұзақ жыл еңбек еткеніне тоқталып, оның Парламент Мәжілісінің Төрағасы ретінде ауқымды реформаларды жүзеге асыруға белсенді қатысқанын атап өтті. Президент жаңа қызметінде де Қошанов қоғамдық келісімді нығайтуға үлес қосады деген сенім білдірді.
Қазақстан Халық Кеңесінің құрамына кәсіби білімі мен тәжірибесі бар, қоғамда беделге ие азаматтар кірген. Олардың қатарында мемлекет және қоғам қайраткерлері, кәсіпкерлер, сарапшылар, түрлі сала өкілдері мен белсенді азаматтар бар.
Мемлекет басшысы Кеңес мүшелерінің алдында тұрған жауапкершілікке де ерекше назар аударды. Оның айтуынша, елдің мүддесі үшін адал қызмет ету – үлкен мәртебе әрі қастерлі міндет. Сондықтан Халық Кеңесінің әрбір мүшесі қоғамдық келісімді нығайтуға және мемлекеттілікті одан әрі бекемдеуге өз үлесін қосуы қажет.
«Сіздер ел игілігі үшін табанды еңбек етіп, мемлекеттігімізді нығайтуға зор үлес қосасыздар деп сенемін. Ырысты ынтымағымызды, қоғамдық келісімді күшейту үшін белсенді түрде еңбек етесіздер деп ойлаймын», – деді Қасым-Жомарт Тоқаев.
Президент Қазақстан Халық Кеңесінің алдында тұрған негізгі міндеттерге сессияның негізгі отырысында кеңірек тоқталатынын айтты.
