WILDBERRIES ҚАЗАҚСТАНДА ҚОЙМА ІЗДЕП ЖАТЫР
Wildberries компаниясы тауарларын Қазақстан аумағындағы қоймаларға көшіру мүмкіндігін қарастырып жатыр. Алдын ала мәліметтерге сәйкес, компанияға шамамен 100 мың шаршы метр қойма алаңы қажет.
Қазіргі уақытта компания елдегі бос қойма нысандарын зерттеп, қолжетімді логистикалық алаңдардың едәуір бөлігін жалға алу мүмкіндігін қарастыруда. Кейбір ақпарат көздері мұны компанияның ықтимал қауіп-қатерлерден қорғану және логистикалық тәуекелдерді азайту мақсатында қолға алып жатқанын айтады.
Алайда Wildberries бұл ақпаратты ресми түрде растаған жоқ. Компания тек логистикалық желісін кеңейту және инфрақұрылымды дамыту жұмыстары жоспарға сай жалғасып жатқанын мәлімдеді.
Бүгінде Алматы қаласында ауданы 100 мың шаршы метрден асатын жаңа қойма кешенінің құрылысы жүріп жатыр. Сонымен қатар Астанада көлемі 160 мың шаршы метр болатын ірі логистикалық орталық салынып жатыр. Компания бұл жобалар жеткізу жүйесінің тиімділігін арттырып, Қазақстандағы қызмет ауқымын кеңейтуге мүмкіндік беретінін атап өтті.
