ҚАЗАҚСТАНДА БИОМЕТРИЯЛЫҚ АУТЕНТИФИКАЦИЯНЫҢ ЖАҢА ЕРЕЖЕЛЕРІ КҮШІНЕ ЕНДІ

Жаңа талаптарға сәйкес, пайдаланушының жеке басын растау бет-әлпетінің биометриялық бейнесі арқылы жүзеге асырылады. Бұл тәсіл цифрлық қызметтердің қауіпсіздігін күшейтіп, алаяқтық әрекеттердің алдын алуға бағытталған.

Ережеге сәйкес, бөтен адамның фотосы немесе бейнесі арқылы жүйені алдау әрекеттеріне жол бермеу үшін пайдаланушыдан кемінде үш кездейсоқ әрекетті орындау талап етіледі. Жүйе осы әрекеттердің дұрыс орындалғанын автоматты түрде тексереді.

Егер биометриялық тексеру үш рет қатарынан сәтсіз аяқталса, пайдаланушы аутентификациядан өтпеген болып есептеледі және жүйеге кіруге рұқсат берілмейді.

Сонымен қатар жаңа ережелерде биометриялық деректерді жинау, өңдеу, сақтау және пайдалану тәртібіне қойылатын талаптар нақтыланған. Құжатта ақпараттың қауіпсіздігін қамтамасыз ету және азаматтардың жеке деректерін қорғау мәселелеріне ерекше назар аударылған.

Жаңа нормалар қаржы және төлем қызметтерін пайдалану кезінде қауіпсіздік деңгейін арттыруға, сондай-ақ цифрлық алаяқтық тәуекелдерін азайтуға бағытталған.