АЛМАТЫДА ҚАЙРАТ САТЫБАЛДЫ МЕМЛЕКЕТКЕ ҚАЙТАРҒАН ҚОНАҚҮЙ 12,7 МЛРД ТЕҢГЕГЕ САТЫЛЫМҒА ШЫҒАРЫЛДЫ
Алматыда бұған дейін Қайрат Сатыбалдыға тиесілі болған DoubleTree by Hilton Almaty қонақүй кешені электронды сауда-саттыққа шығарылды. Мемлекет меншігіне өткен нысанның бастапқы бағасы 12,7 миллиард теңге болып белгіленген. Аукцион 25 қыркүйекте өтеді.
Нысанды Алматы қаласының мемлекеттік мүлік және жекешелендіру департаменті сатылымға шығарған. Электронды сауда-саттық бағаны көтеру әдісімен ұйымдастырылады. Аукционға қатысу үшін үміткерлер 1,9 миллиард теңге көлемінде кепілдік жарна төлеуі тиіс. Сауда 2026 жылғы 25 қыркүйек күні сағат 10:00-де басталады.
Сатылымға шығарылған DoubleTree by Hilton Almaty қонақүйі Алматының Алмалы ауданындағы Досмұхамедов көшесі, 115 мекенжайында, Орталық стадионға жақын орналасқан. Кешеннің жалпы ауданы 16 196,4 шаршы метрді құрайды. 11 қабатты ғимаратта 112 қонақүй бөлмесі бар. Сонымен қатар нысан құрамында мейрамхана, бассейн, SPA орталығы, хаммам, жаттығу залы және үлкен банкет залы қарастырылған.
Лоттың нақты бастапқы бағасы 12 миллиард 759 миллион 410 мың теңге деп көрсетілген. Бұл нысанның 2026 жылғы бағалау нәтижесінде белгіленген құны. Кей деректе қонақүйдің баланстық құны шамамен 4,78 миллиард теңге болғаны айтылған. Ал қазіргі аукциондық бастапқы баға осы көрсеткіштен едәуір жоғары белгіленіп отыр.
Маңыздысы, сатып алушы қонақүй ғимаратын иеленгенімен, оның ішіндегі барлық мүлік пен бренд құқықтары лот құрамына кірмейді. Атап айтқанда, жиһаз, жылжымалы мүліктің бір бөлігі, DoubleTree by Hilton атауы, тауар белгісі, коммерциялық атауы, зияткерлік меншік нысандары және франчайзинг келісімі бойынша құқықтар сатылымға енгізілмеген.
Қонақүй орналасқан жер телімі де жекешелендіру нысанының құрамына енгізілмеген. Құжаттарда жер учаскесінің көлемі 0,2581 гектар екені көрсетілген. Дегенмен қолданыстағы заңнамаға сәйкес, жерді пайдалану құқығы ғимаратты сатып алған тұлғаға өтеді. Сонымен қатар жер учаскесіне Алматы қаласының Энергетика және коммуналдық шаруашылық басқармасына қарасты «Су желісі» мекемесінің пайдасына сервитут белгіленген.
DoubleTree by Hilton Almaty нысаны Қайрат Сатыбалды мемлекетке қайтарған активтердің қатарында болған. Қонақүй 2023 жылғы 18 қыркүйекте жасалған сыйға тарту шарты негізінде мемлекет меншігіне өткен. Бұған дейін нысанның 2021 жылы Қайрат Сатыбалдымен байланысты компания арқылы сатып алынғаны хабарланған еді.
